Diamars ultimo, Hues den Prome Instancia a condena un homber di 24 aña di edad via e asina yama snelrecht pa un castigo di prison di 12 luna, di cual 4 ta condicional. E sospechoso a keda deteni dos siman pasa, riba 14 di april 2024, cu dos arma di candela den su posesion.
Ministerio Publico (OM) a informa den un comunicado di prensa cu esaki ta e prome biaha cu a tene un tratamento di snelrecht na Aruba. Aplicacion di snelrecht a bira posible despues di introduccion di e Codico di Procedimento Penal nobo. Via snelrecht e sospechoso ta bay haya sa mes ora, dentro di 17 pa 20 dia, con e ta para, door cu e tratamento di su caso ta tuma lugar dentro di e terminonan di su detencion.
