Johnathan Harms-Maduro conoci como “Duque Malo El Rey” ta un persona cu ta gusta yuda esunnan mas vulnerabel den comunidad, na unda cu e aña aki e ta bin preparando un actividad pa luna di december, den temporada di Pasco cu ta e epoca mas bunita di aña.

Durante un entrevista na Bon Dia Aruba Harms-Maduro a conta cu su profesion tabata cooker, pero door di problemanan di salud e mester bay su cas y a cuminsa inverti su tempo pa crea su fundacion denomina “Stichting Tio Duque” caminda cu tabata organisa actividadnan pa personanan mas vulnerabel dos biaha pa aña na Hulanda, luga na unda e tabata biba.

E actividadnan tabata trata di ‘Back to School’ y ‘Christmas Dinner’ cu e tabata organisa pa muchanan cu menos recurso y door cu Hulanda ta multicultural e tabata haya tur sorto di mucha cu tabata asisti hunto.

El a cuminsa haci esaki tres aña pasa segun el a sigura y awor e fundacion mes tin dos aña y cu “mi deseo tabata ta pa crea un stichting pa yuda e muchanan”, Harms-Maduro tin algun lunanan caba na Aruba y e ta bay keda pa compaña su mama cu tin un estado di salud delicado, el a comenta cu el a nace akinan mes na unda cu e kier haci e mesun actividadnan aki na su pais natal “pa mi muchanan, muchanan Arubiano”.

Asina mes, el a informa cu e tabata kier a haci e ‘Back to School’ pero e no por a logra pa motibo di tempo, pero awor e ta organisando su prome ‘White Linnen Christmas Dinner pa Muchanan’ na Aruba, esun di mas grandi cu el a yega di haci a tuma luga na Wunderland, un pret park na Kalkar, Alemania cerca di e frontera cu Hulanda na aña 2019 caminda cu 150 mucha a come y bebe, di esaki el a enfatisa cu su presupuesto tabata 0 euro pa e actividad, pero na final el a logra recauda 20.000 euro.

Su fundacion ta un ‘non profit organization’ na unda cu e ta traha cu donacionnan “pero e simpel hecho di acerca e hendenan, papia cu e hendenan, convence nan tambe bo por haya hopi no di hende cu no ta kere den bo, pero asina mes e aña ey mi a logra”, el a bisa.

Pa e Christmas Dinner’ na Aruba el a cuminsa busca personanan, companianan interesa pa duna un man y apoya e iniciativa aki cu ta pa duna na esunnan cu tin mas necesidad, manera ta conoci pandemia Covid-19 a trece hopi retonan pa comunidad y famianan mes y esaki por duna na nan un tiki di alegria den temporada di Pasco.

“Esaki pa mi ta un reto, pa mi por haci’e pero mi ta gusta traha cu presion pa logra e meta”, Harms-Maduro a informa cu e actividad lo tuma luga na Centro di Bario di Brazil, dia 18 di december di 2021 for di 5or di atardi te cu 9or di anochi y tambe lo conta cu e participacion di Mike’s Disco y Aguinaldo Flor di Pasco, e entrada lo ta gratis y ta dirigi pa 120 mucha cu e kier dedica esaki na nan pa asina nan lo ta contento, baila, gosa pa nan keda corda e dia aki.

Tocante e cena, e ta consisti di cuminda buffet na unda cu muchanan lo come y tur esey lo ta posibel door di donacionnan cu ta espera di por haya sea cu placa of cu cuminda mes, mami y papi tambe ta bonbini na e cena aki manera Harms-Maduro a anuncia pa asina tambe nan por come y pasa un rato diferente.

Pa finalisa, Harms-Maduro a expresa e invitacion ta habri dia 1 di october na unda cu esunnan interesa lo tuma contacto cu sra Dijkhoff na e number di telefon 562.1591 pa asina por haya mas informacion ya cu e cuponan pa muchanan ta limita.