Ayera mainta a yega Aruba e mega crucero Allure of the Seas, un di e cruceronan mas grandi di e liña di crucero Royal Caribbean. Durante un conferencia di prensa na e entrada di e crucero Minister di Turismo, Dangui Oduber, hunto cu director di Aruba Ports Authority (APA), Mark Figaroa, a elabora ariba e proceso cu a cana pa e mega crucero por a yega Aruba y tambe kico esaki ta nifica pa Aruba.

“Algo cu nos ta considera un momento historico pa Aruba por ricibi awe Allure of the Seas, e crucero mas grandi cu den historia di Aruba cu waf di Oranjestad por a ricibi”, Minister Oduber a expresa ariba e yegada di e mega crucero. El a splica cu despues di un proceso largo di negociacion, a dura algun aña pa convence Royal Caribbean pa nabega cu Allure of the Seas pa Aruba.

Durante varios aña caba reparacionnan tabata canando pa asina Aruba por ricibi e mega crucero. Minister a recorda cu algun aña atras Ministerio di Turismo mester a haci un inversion basta cuantioso pa inverti den un tugboat nobo. Despues di esaki nan mester a realisa haci e proceso di dragamento necesario algun tempo atras y a splica e motibonan pakico mester a haci e inversion di 1.6 miyon florin pa dragamento pa asina ricibi e mega crucero aki.

“Awe nos por mira resultado concreto cu Aruba awe por ta orguyoso di por a ricibi e mgea crucero aki. Bo ta mira tambe e resultado concreto, e impacto grandi cu un mega crucero ta haci na momento cu e drenta nos wafnan den Oranjestad, ki impacto e tin pa nos economia, ki impacto e tin pa centro di cuidad sigur ta un esfuerso den conhunto entre Ministerio di Turismo, Aruba Ports Authority, Aruba Tourism Authority, tur e empleadonan y APA tambe cu pa añanan largo a hiba combersacionnan y tambe negociacionnan cu awe porfin nos por ricibi e mega crucero aki”, Minister Oduber a remarca.

El a enfatisa tambe cu net e temporada abao, low season, a cuminsa cu un impacto positivo asina grandi despues di un high season caminda tabatin retonan. El a recorda cu na januari APA tabatin bastante call di crucero ariba schedule, pero pa motibo di e variante Omicron a ricibi varios cancelacion cu e temporada halto, high season, no a bay manera cu a premira. No obstante esey, Royal Caribbean a demostra su compromiso pa durante low season cada pasa dos siman Aruba lo ricibi e mega crucero, Allure of the Seas.

Pa loke ta e ocupacion di e crucero mes, Minister Oduber a subraya cu e ocupacion ta hopi bon pa su prome yegada na Aruba. E barco mes ta carga mas di 6.300 pasahero ora cu e ta na full capacidad y e barco a yega Aruba cu mas di 4.300 pasahero. “Ta bunita pa mira e impacto directo cu bo ta nota den nos waf. Nos ta contento tambe cu e hecho cu nan a compromete nan mes pa cada pasa dos siman nos ricibi e mega crucero”, el a indica.

Director di APA, Mark Figaroa tambe a expresa su orguyo pa cu e logro aki pa Aruba. El a ratifica cu despues di hopi tempo di combersacionnan, reunionnan, pa dicidi cua ta e momento oportuno pa ricibi e Oasis Class, Allure of the Seas.

Figaroa a subraya cu e yegada di e mega crucero aki ta mustra cu e recuperacion post covid ta riba e caminda corecto. Manera a keda menciona caba, fin di december, januari cu februari e variante di COVID-19 Omicron a haci un impacto drastico ariba turismo. El a menciona cu APA a perde casi 15 call di crucero den luna di januari solamente, locual ta casi 20 mil pasahero menos. “Pero awe nos a mira un barco cu tin 4.505 pasahero pa prome biaha y segun mi a compronde e siguiente callnan ta mas hopi ainda”, el a bisa.

“Mi ta kere esaki ta e prome paso pa e recuperacion di Aruba di e turismo crucero. E spinoff effect cu bo tin pa tour operator, e tiendanan etc. mi ta kere ta un logro y e cantidad ta papia di dje tambe”, el a agrega.

E team di huur di kioskonan pafo di waf a wordo treci pa dilanti den un pregunta cu a wordo haci na Minister Oduber door di un miembro di prensa. Minister a informa cu despues di dos aña e situacion ta hopi dificil pa tur esnan cu ta maneha e kiosko. El a subraya cu Ministerio di Turismo tin nan atencion riba e tema aki y segun el a indica APA ta hibando combersacionnan cu DIP pa asina wak si APA por tuma over e maneho di e kioskonan, pero no tin un decision final ainda.

El a splica cu si ta e caso cu APA tuma over e maneho di e kioskonan aki, nan lo bay den negociacion cu tur esnan cu ta maneha e kisokonan pa wak kico lo ta un tarifa di huur aceptabel pa nan, pero teniendo na cuenta tambe cu mester crea e entradanan necesario di parti APA den e caso ey pa asina haci e mantencionnan necesario.

“Loke bo kier ta keda haci inversionnan como pais den bo infrastructura pa tur e turistanan cu ta bin bo duna nan e experiencia cu nan ta buscando”, Minister a agrega.

Minister a gradici director di APA pa e trabou- y negociacionnan cu a wordo hiba pa yega na e logro aki. “E ta yena nos cu orguyo y satisfaccion cu Aruba ta un destinacion cu nos por bisa ta cla pa ricibi mas mega crucero den futuro pasobra esaki ta e direccion tambe cu e industria crucero ta bayendo, cada bes e barconan ta birando mas grandi y nos ta looking forward caba pa e siguiente mega crucero cu nos ta plania di ricibi otro aña”, el a expresa.