(Infobae) – Hefenan di Ehercito, Armada y Aviacion di Brasil diamars ultimo a renuncia, un dia despues cu presidente Jair Bolsonaro, a anuncia seis cambio den su gabinete, cu a inclui e salida di minister di Defensa.
E substitucion den masa di e tres hefe militar ta un hecho nobo y a wordo interpreta como un contesta na e gestonan di solidaridad cu e general Fernando Azevedo e Silva, ken a laga e Ministerio di Defensa dialuna ultimo den mey di e proceso di destitucion of reemplaso di seis di e 23 minister di Gobierno.
E reemplaso di e comandantenan Edson Pujol (Ejército), Ilqes Barbosa (Marina) y Antonio Carlos Bermudes (Aeronáutica) a wordo dicidi den un reunion na Brasilia “cu presencia di Ministerio di Defensa, Braga Netto, y ex-minister, Fernando Azevedo” e cartera a anuncia den un comunicado.
Azevedo e Silva no a aclaria si su salida di Defensa tabata producto di su renuncia of esey a wordo dicidi pa Bolsonaro, un capitan di reserva di Ehercito cu a wordo apoya cu e militarnan pa goberna, aunke den ultimo lunanan a haya cierto diferencia cu Forsa Arma, cu ta rechasa su negacion pa e pandemia di coronavirus.
Desde dialuna ultimo, den medionan di comunicacion militar a wordo sigura cu e tres hefe di Forsa Arma tabata dispuesto pa “pone nan funcion na disposicion” despues di e salida di Azevedo e Silva.
Sinembargo, e mesun Ministerio di Defensa a informa solamente den un nota oficial cu “lo wordo substitui” y a sigura cu e decision “a wordo comunica” den un reunion cu e tres mando a haci diamars ultimo cu general Walter Braga Netto, te awor minister di Presidencia y ken lo asumi e funcion cu Azevedo e Silva tabata ocupa.
Dialuna ultimo, den mey di fuerte presionnan di su base politico mas modera, Bolsonaro a anuncia cambionan den seis ministerio, entre e cual a figura, ademas di esun di Defensa, otro strategico como Relacionnan Exterior y Husticia.
