Ayera Witgele Kruis (WGK) hunto cu POH y AZV a haci e anuncio cu cinco persona despues di un screening riguroso a logra pasa pa bira Praktijkondersteuner Huisartsen Geestelijke Gezondheidszorg (POH – GGZ) cu lo dura ocho luna, algo nobo pa Aruba segun director di WGK, Gino Goeloe a bisa.

E cinco Praktijkondersteuner ta bay sostene e dokternan di cas den tereno di salud mental, entrante 1 di september 2024. Nan ta bay inicia nan carera nobo y nan ta bira e prome grupo na Aruba cu lo drenta den formacion como specialista den e ramo di salud mental via Instituto di educacion RINO Zuid Caribbean. Nan lo bira enfermera specialisa cu lo apoya e dokter di cas den orientacion y tratamento di hendenan cu problemanan psicologico, psicosocial of psicosomatico.

Praktijkondersteuner den ramo di salud mental no tin e funcion pa señala, coordina y interveni, hunto cu e pashent ta aclaria e keho of sintomanan y ta ehecuta un plan di tratamento, tur esaki bao responsabilidad di e dokter di cas pero cu su propio responsabilidadnan.

Tambe, nan ta traha preventivamente. E ta identifica y interveni cu e meta di evita referencia innecesario of recaida. Ora ta necesario e Praktijkondersteuner GGZ lo percura pa referi na e siguiente profesional den e ramo di salud mental.

E prome POH-GGZ a ser introduci a traves di e Sociaal Crisisplan, y actualmente ta forma parti integral di e maneho pa atende cu salud mental. E roadmap ta consisti di tres parti, e prome parti ta enfoca riba prevencion, e di dos ta pa haci e cuido mas accesibel, y e di tres ta pa percura pa tin un bon “nazorg”. Banda di esaki, e POH GGZs lo yuda alivia e ‘wachtlijsten’ y baha e presion riba e prome y e di dos liña. Tambe, lo por brinda cuido mas lihe, pa motibo cu por diagnostica y wordo ‘doorverwezen’ mas lihe.

Salud mental ta algo hopi importante, despues di pandemia Covid a bin dilanti hopi caso di depresion y intento di suicidio unda na Aruba a registra algun caso lamentabel na unda a cuminsa pensa conhuntamente cu tur partners manera Respaldo, Stichting Hunto, stuurgroep di minister Rocco Tjon y tambe minister Dangui Oduber pa papia di kico nan lo por a haci, e ora ey a bin e POH -GGZ.

Gino Goeloe di WGK a sigura cu for di aña pasa caba tabatin un proyecto cu a bay bao di vierlanden unda tabatin un opleiding y eynan WGK tabatin un POH cu a bay un opleiding di POH – GGZ dedica pa pashentnan diabetico y cu malesa di curason (somatic) pero ademas a haci esun di salud mental tambe. Aña pasa el a gradua y for di eynan nan a ripara cu esaki ta algo bon pa Aruba.

E idea a bin for di minister Tjon y minister Oduber pa por combati e problema aki cu ta afecta e comunidad di Aruba “pero nos tin cu enfoca riba e raiz, riba e dokter di cas, pasobra hopi biaha ora un persona tin un problema mental, e no ta yega na Stichting Respaldo ni Stichting Hunto di biaha, ora nan ta wak bo eynan di biaha ta bisa bo, bo ta loco. Siendo cu a bay por ta pa papia pasobra tin depresion, p’esey aworaki nos a baha e drempel ey, awor na dokternan di cas caba bo ta haya e servicio aki,” Goeloe a sigura.

Ademas el a splica cu den e proceso ey, e persona ta papia cu su dokter di cas di su problemanan y e POH cu ta specialisa riba e tereno ey ta bay yuda, guia y si e caso mester bay mas leu, nan ta verwijs na e psikiatra.

“Pa e motibo aki nos ta contento cu nos lo firma e prome cinco candidato cu ta bay haci un opleiding di ocho luna cu tin acreditacion,” Goeloe a menciona.

Di su parti, Edwin Jacobs director di AZV a señala cu esaki ta bon paso den cuadro di sigui amplia y profesionalisa e cuido mental na Aruba. Den acuerdo cu nan a cera aña pasa cu cuido a palabra cu lo fortifica e prome liña y cu e POH – GGZ aki nan ta cumpliendo cu e palabracion di fortifica esey.

“Nos salud mental ainda tin un caminda largo pa bay, den parlamento por nota cu tin un sosten politico pa pasa e cuido di salud mental pa e seguro tambe y asina lo ser cubri door di e seguro. AZV a demostra den ultimo 22 aña cu su presencia den cuido medico ta garantisa accesibilidad na su aseguradonan cu cuido di calidad y tambe un cuido sostenibel,” el a sigura.

Jacobs tin e confiansa cu den futuro lo por ta posibel cu tur asegurado di AZV lo tin acceso na cuido di salud mental.