Pa otorga ayudo financiero mas largo; Hulanda ta bin cu condicionnan mas estricto

Prome Minister, Evelyn Wever-Croes a premira riba desaroyo di e crisis actual di Covid-19, cu den seno di conseho di minister di Reino, nan a cuminsa papia riba ayudo mas largo for di juli pa dilanti. Pero e ayudo aki ta mara na condicionnan ‘no facil… condicionnan dificil.’ Pero tampoco ‘imposibel,’ segun e mandatario.

El a gradici gobierno di reino pa e sosten financiero brinda den forma di prestamo faborabel pa Aruba. Pero el a reconoce cu cada biaha e posibilidad di sigui otorga e sosten aki ta birando mas dificil. “E condicionnan cada biaha ta bira mas complica pa cumpli cu nan,” segun e prome mandatario. E ta reconoce cu a pesar di esaki mester reconoce y gradici cu ora nos tabata den problema mas serio, Hulanda tabat’ey pa yuda nos.

E mandatario a bisa cu ya caba Hulanda a indica cu ta dispuesto pa sigui duna e tipo di ayudo cu nan ta brindando cu prestamo cero interes, y cu no mester paga mesora bek. Sino despues di e termino di 2 aña, cu e posibilidad di por refinancia bek si ta necesario.

Sinembargo esaki lo por ta posibel a base di condicionnan hopi estricto. E prome paso ta cu nan no lo desea cu e proceso aki lo sigui entre gobierno. Hulanda lo kier institui un entidad cu lo por midi riba resultado. Pues si e partnernan den Reino: Aruba, Corsou y St. Maarten cumpli debidamente, Hulanda lo por considera e sosten.

Pa otorga e otro fiansa despues di 3 di juni ta inclui dos categoria di exigencia. E prome categoria tin di haci cu baha gasto di personal. E di dos, gobierno mester bin cu reforma structural di gasto y entrada.

Premier Wever-Croes a laga sa cu e condicionnan relaciona cu e dos categorianan aki, ta uno generico, y nan ta conta no solo pa Aruba, sino pa Corsou y St. Maarten. El a señala cu Corsou y St. Maarten tin mas condicion poni riba mesa pa nan. El a bisa cu Aruba den comparacion cu otro partner di Reino ta basta adelanta riba e tereno di bahamento di gasto.

Pa e prome categoria den e conseho di minister di Reino a keda dicidi cu tin 3 clasificacion di gasto cu mester wordo baha. E prome -cu ya caba a wordo tuma adelanta- ta inclui baha salario di minister y parlamentario cu 25%. Y tambe elimina indexering pa nan. E di dos condicion ta cu salario di empleado publico, semi publico mester baha cu 12.5%. Instancia financia pa gobierno manera fundacion cu 50%. Compania estatal 12.5%, pero mester elimina indexering tambe.

E di tres condicion ta pa esnan cu tin salario halto denter di e sector publico y semi publico, mester maximalisa entrada na 130% di e salario di Minister Presidente. Locual nan a yam’e como e Wever-Croes-norm.

E di dos categoria di e condicionnan di Hulanda ta encera cu gobierno mester presenta un plan di reforma structural di gasto y entrada prome cu dia 15 di juni. E mandatario a bisa cu nan ta trahando riba e plan aki caba y e ta convenci cu pa dia 15 di juni nan “lo tin un bon producto caba pa por presenta.” Mester ta un plan concreto, segun exigencia di conseho di Minister di Reino.