Manera Bon Dia Aruba a publica algun dia atras, dialuna 1 di juli mester a drenta na vigor oficialmente e cobransa di sustainability fee di 20 dollar na turista. E sustainability fee aki e turistanan mester paga prome cu nan drenta Aruba a traves di nan aplicacion di ED-Card, pero e cobransa no a drenta na vigor ainda.
Mirando cu turistanan tabata indica ariba rednan social cu nan a yena e formulario pa nan ED-Card pa por drenta Aruba y a ricibi esaki sin cu nan mester a realisa ningun pago, Bon Dia Aruba a tuma contacto cu e instancia concerni pa puntra kico ta e motibo cu ainda no a implementa e sistema di cobransa di sustainability fee.
Tres dia atras Bon Dia Aruba a tuma contacto cu Utilities Aruba NV, cu ta encarga cu customer service pa loke ta e topico aki, pa puntra kico ta e motibo cu ainda no a cuminsa cobra e
turistanan e sustainability, aunke e ley a drenta na vigor.
Siguiente dia, dos dia atras, representante di Utilities Aruba NV a contesta preguntanan di Bon Dia Aruba y a indica cu en berdad no a implementa e sistema di cobransa di e sustainability fee ainda.
“Tin un delay den e implementacion di e proceso di pago. Pa awor tur non-resident tin cu yena e ED Card normal y unabes cu e proceso di pago ta implementa e lo bira visibel den e app,” el splica.
Na mesun momento el a enfatisa cu ta hopi importante si pa tur non-resident usa e website oficial pa yena nan ED Card, cual ta edcardaruba.aw.
E sustainability fee aki ta algo cu gobierno a implementa como parti di e solucion pa yuda repara
y mantene e planta di RWZI. E cobransa aki mester a drenta na vigor hunto cu e ley di privatisacion di RWZI.
E implementacion di e sustanaibality fee a ricibi diferente critica cuestionando pakico ta e turistanan ta esunnan cu tin cu paga pa por drecha e situacion di RWZI y no e hotelnan mes.
Durante un conferencia di prensa na comienso di luna di juni, prome minister Evelyn Wever-Croes a splica cu nan haciele di e forma aki pasobra nan a papia cu e hotelnan tocante esaki, pero hotelnan mes no tabata kier.
Inicialmente e ley cu a wordo entrega na parlamento tabatin otro financiamento y e
financiamento ey tabata pa aumenta e environmental levy, e belasting cu turistanan ta paga na
hotel pa medio ambiente.
Pero esey, el a indica, no a conta cu sosten y mirando e urgencia y aceptacion mas grandi, specialmente den e sector turistico a tuma e decision pa introduci e cobransa di 20 dollar a traves di e ED-Card.
