ORANJESTAD – Ainda despues di dies aña, e Codigo Civil Aruba (BWA) no ta na vigor, pasobra e introduccion di esaki a wordo stroba pa e discusion tocante registracion di pareha di mesun sexo.
Segun un articulo di Bobby Spier riba retkaribense, Carlos Bollen, hefe di derecho priva na Universidad di Aruba, ta haya cu gobierno mester mustra curashi y pusha pa introduccion di e codigo civil nobo, di cual e version nobo a keda aproba pa parlamento desde aña 2016.
Bollen tabata parti di e comision encarga cu evaluacion di e concepto di e texto di e codigo, y segun el a conta Spier, ‘nan tin miedo di e asunto di partner registra’. Durante e tratamento di e codigo nobo na 2016, cu un mayoria chikito a acepta un amienda pa partner registra, pa asina parehanan di mesun sexo por registra y formalisa nan relacion huridicamente, sin cu mester casa. Actualmente, pareha homosexual no por casa na Aruba, pero nan por casa pafo di Aruba y despues inscribi nan union den e registro matrimonial. Di e forma aki nan por tin e mesun derecho cu tur pareha casa na Aruba. Pero pa esunnan cu no kier casa, e opcion no t’ey ainda.
Retkaribense a entrevista un ambtenaar femenino, cu a prefera di keda anonimo, ya cu e tin miedo cu su declaracionnan por afecta su trabou y su relacion cu su coleganan. Como cu e ta den un relacion homosexual, e ta ‘warda e registracion di partner ansiosamente’ pa asina sigura su futuro cu su pareha, por ehempel, pa locual ta herencia y pensioen.
“Mi por corda e simannan cu nos a sinta oranan largo den parlamento pa trato di e ley nobo aki. Anto awo ainda nos ta warda. E slogan One Happy Island bon mira, mester ta One Happy Island Except if you’re Gay”, el a bisa. El a agrega cu den su opinion, e no ta haya husto cu como pareha homosexual tin unicamente e opcion di bula bay Bonaire pa casa (mirando cu na Corsou tampoco ta posibel pa pareha homosexual casa). “Kisas ta un asunto religioso of politico, pro mi ta sigur cu nos mester tin mesun derecho.”
Banda di su propio relacion, su amigonan homosexual tambe ta haya problema ora di bula pa Boneiro, ya sea paso ta mucho caro, of simplemente nan kier scoge pa ta un partner registra. Un persona clave kende a tuma iniciativa pa registra partner ta e politico Desiree de Sousa Croes. E ta confirma cu introduccion di codigo civil nobo ta pega cerca gobierno pa motibo di ‘discusion cu a keda lastra’ tocante e tema. E ta haya e hecho cu e topico aki a keda pega como un ‘idioteria’.
“Ta increibel cu e amplificacion di e deber di alimentacion, introduccion di e punto di denuncia di abuso di mucha, cambionan na fabor di cliente, y 800 cambio mas cu ya caba ta existi den otro parti di reino, ta keda derota pa motibo di registracion di partner”, De Sousa Croes a comenta, agregando cu como abogado, tur dia e ta mira clientenan perhudica pa e legislacion bieu. Codigo civil actual a wordo introduci na 2002, y falta di actualisacion ta nifica cu Aruba su legislacion ta esun di mas atras den henter reino.
