Un persona di inicialnan B.B.., ken su orden di deportacion tabata den cuadro legal, a wordo laga den libertad debi cu segun DIMAS a bisa un Hues Comisario di Corte di Prome Instancia, na e momento ey nan no tabatin decision ainda tocante su asilo y no por a entrevista e persona en cuestion. Pero documentonan oficial di DIMAS ta mustra un escenario totalmente diferente.

Hechonan di e caso di e persona di inicialnan B.B. – pa su privacidad y seguridad Bon Dia Aruba no lo menciona su nomber – a cuminsa dia 6 di april di 2020 ora el a entrega un peticion pa asilo.

Como prueba, B.B. a yena un formulario di registracion; a raiz di e peticion di asilo e persona B.B. a wordo scucha dia 20, 21 y 23 di April di 2020 door di un funcionario di gobierno (DIMAS) C.Giel, segun fuentenan cu Bon Dia Aruba no ta bay revela.

Manera ta conoci, Bon Dia Aruba a publica un articulo dia 27 di juni ultimo cu e titulo: “Segun documento cu a leak, Hurista di DIMAS a gaña Hues Comisario di Corte di Prome Instancia”.

Segun documento cu a leak, Hurista di DIMAS a gaña Hues Comisario di Corte di Prome Instancia

Bon Dia Aruba continuando cu su investigacion, a dicidi di busca e otro banda di e medaya di e instancia concerni cu ta DIMAS, su director Kathy Paskel y hurista y hefe di asilo Jacqueline Harewood.

Hechonan: Declaracion di J. Harewood hurista di DIMAS no ta cuadra cu Corte di Aruba

Riba punto 4.2 di e sentencia di dia 10 di juni di 2020 (AUA202001277) di hues comisario, J. Harewood (DIMAS) a duna di conoce durante e tratamento di e caso cu e procedura pa tuma decision a tarda pa motibo cu e persona concerni (B.B.) tabata den cuarentena pa dos siman largo, esaki relaciona cu e reglanan na vigor pa preveni e contagio di coronavirus. Como consecuencia, e persona aki no por a wordo scucha. Segun pagina 2 di e documento y mas investigacion periodistico, e persona B.B. a wordo scucha dia 20, 21 y 23 di April di 2020 door di un funcionario di gobierno (DIMAS) C. Giel, cu ta 44 dia prome cu e audiencia di e persona en cuestion.

Tambe, hues comisario M. Soffers a bisa: dia 10 di juni di 2020 segun documento (AUA202001277) cu “Awor cu B.B. ta den detencion en espera di e decision di su peticion di asilo, DIMAS mester trata e peticion di asilo mas lihe cu ta posibel”. Pero, segun pagina 3 di documento cu Bon Dia Aruba a publica caba dia 27 di juni ultimo, DIMAS no por trata algo mas lihe cu ta posibel si e persona B.B. ya caba tabatin un decision negativo riba su peticion di asilo na DIMAS riba dia di 4 di mei di 2020.

Kathy Paskel, director di DIMAS

Dia 30 di juni di 2022, Bon Dia Aruba a tuma contacto cu Director di DIMAS Kathy Paskel pa puntra e banda di medaya pa loke ta trata e articulo cu Bon Dia Aruba a publica cu e titulo “Segun documento cu a leak, funcionario di DIMAS a gana un hues comisario”, na e momento ey, redactor di Bon Dia Aruba a puntra Paskel pa e-mail di Jacqueline Harewood ken ta hurista y tambe ta hefe di departamento di asilo na DIMAS -cu mayoria di biaha su persona ta representante e instancia den Corte- pa asina ey tambe haya un declaracion di dje tocante e articulo menciona.

Paskel su contesta pa e diferente preguntanan cu redactor a manda via e-mail pa loke ta trata corupcion y gañamento di un hues comisario door di funcionario di DIMAS, tabata cu:

“E NO ta den nos practica ni etica di trabao pa duna informacion falso of incorecto na corte.”

Un contesta cu por wordo considera bashi di parti di director di DIMAS,cu no ta duna ningun informacion di e preguntanan basa riba e articulo di Bon Dia Aruba riba e caso specifico di e persona B.B.

Loke a puntra tabata dirigi specificamente riba e proceso di asilo y e preguntanan haci personalmente na Paskel tabata lo siguiente:

– Ki dia Paskel personalmente a haya e beschikking di e decision negativo di e funcionario di Dimas di e caso di e persona B.B.?

– Paskel por tabatin contacto sea personal, telefonico of Whatsapp cu representante legal di e persona B.B. prome cu e audiencia di dia 03 di juni di 2020?

-Paskel a haya e decision di e persona B.B. den e-mail prome cu dia 20 di mei di 2020 of despues? Si e contesta ta si, ki dia?

-Paskel a haya un orden for di un superior di su persona – e tempo ey – pa laga e persona aki di un manera of otro den libertad via DIMAS?

Dia 3 di juni di 2020, a sali na cla den corte cu ainda no a tuma decision riba e peticion di asilo di e persona B.B. for di fecha 6 di april di 2020, na momento ey J.Harewood (DIMAS) a duna di conoce durante e tratamento di e caso cu e procedura pa tuma decision a tarda pasobra e persona concerni tabata den cuarentena pa dos siman largo, esaki relaciona cu e reglanan na vigor pa preveni e contagio di coronavirus, cu consecuencia cu e persona aki no por a wordo scucha.

Pero segun e documento cu a leak, 20, 21 y 23 di April di 2020 e persona B.B. a wordo entrevista door di un funcionario di gobierno (DIMAS) C. Giel, Harewood a bisa den corte cu nunca e no a wordo entrevista door di DIMAS.

E documento ta indica cu dia 4 di mei di 2020 -cu ta 31 dia prome cu e audiencia di 3 di juni di 2020- e persona B.B. tabatin un decision negativo riba e peticion di asilo caba. Esaki ta contradeci Harewood su ponencia den Corte totalmente.

Jacqueline Harewood hefe di Asilo (DIMAS)

Bon Dia Aruba tambe a purba di haya contacto cu J. Harewood dia 30 di juni di 2022 via Whatsapp na unda redactor a puntra su direccion di e-mail pa asina ey manda algun preguntanan den relacion cu e caso aki, pero J. Harewood a dicidi di block e number di telefon di e redactor di Bon Dia Aruba sin contesta e pregunta y sin motibo alguno.

Di mesun manera e preguntanan a ser manda na su e-mail dia juli 7 di 2022 cu lo siguiente:

“Bo persona a bisa Hues Comisario Soffer den corte cu (DIMAS) no a yega na un decision ainda cu e peticion di asilo di e persona B.B., segun informacionnan cu mi ta dispone di dje no solamente bo persona a wordo poni na altura via Whatsapp pero tambe via e-mail di e decision negativo pa peticion di asilo hopi prome cu e zittting di 3 di juni di 2020, DIMAS ya tabata tin un decision caba dia 4 di mei 2020 unda a nenga e peticion di asilo di B.B. (31 dia prome cu e audiencia di 3 di juni 2020) Sra Harewood por confirma esaki?”.

Un otro pregunta tabata: “Sra Harewood tabatin contacto cu su ruman M. Harewood cu tabata ICT di DIMAS den e temporada specifico aki tocante e beschikking original di B.B.? y tambe a puntra si Director di Dimas, Kathy Paskel por a tuma contacto via e-mail cu Harewood tocante e decision di e persona B.B. den e-mail prome cu dia 20 di mei di 2020 of despues? si ta despues ki dia?

Te ainda redactor no a haya contesta for di Harewood pa cu esaki te dia di awe 11 di juli 2022. Bon Dia Aruba lo sigui investiga e caso aki hopi di cerca.