Asina a duna di conoce Joost Meijs, CEO di Aruba Airport Authority N.V., kende tambe a expresa cu COVID-19 tin su efectonan rond mundo y industria di aviacion no ta un excepcion.

Meijs a papia riba e efectonan di e virus pa Aeropuerto di Aruba (AUA Airport), e proyecto Gateway 2030 y loke cu aeropuerto ta haciendo durante e tempo unico aki pa proteha e compania.

El a informa cu desde diasabra ultimo, aeropuerto no ta atendiendo ningun pasahero y no ta ricibiendo ningun vuelo comercial mas como medida di Gobierno di Aruba pa preveni cu e virus sigui plama na Aruba.

“AUA airport ta un infrastructura vital pa pais Aruba y pa e motibo aki mester keda operacional, pa asina facilita vuelonan cu lo yuda e comunidad di Aruba”, Meijs a confirma.

Sinembargo, esaki ta solamente pa vuelonan di alivio of charter, vuelonan di cargo y vuelonan di ambulance cu aprobacion di Gobierno di Aruba y Departamento di Aviacion Civil.

Di mesun manera, el a informa cu orario di operacion nobo tambe ta un di e cambionan cu aeropuerto a introduci mirando e operacion minimo cu tin actualmente. Tambe a señala cu awo aeropuerto ta habri di dialuna pa diabierna for di 9or di mainta pa 6or di anochi, pero den caso di emergencia por haci excepcion.

Meijs a comenta cu AUA Airport ta premira cu pa e siguiente lunanan no lo tin pasahero y cu despues, den un forma gradual, lo recupera y aumenta den cantidad di pasahero te cu luna di december.

“Nos tin speransa cu na december di e aña aki nos lo tin nos operacion atrobe, net prome cu Aruba su temporada peak,” segun Joost Meijs a sigura.

Pa surpasa e temporada dificil aki, el a relata cu a introduci un programa di reduccion di gasto den henter e compania, pa proteha e fluho di placa pa asina por continua cu su operacion den un forma saludabel y stabiel. Esaki ta nifica tambe cu e proyecto Gateway 2030 ta bou di un proceso di evaluacion.

Mirando cu e proyecto riba su mes lo duna Aruba y su economia un empuhe necesario, nan a scoge pa continua cu e proyecto Gateway 2030, pero segun un plan sumamente diferente y di un forma di paso pa paso.

Ademas, Meijs a bisa cu ekipo di maneho di aeropuerto ta balora tur empleado y e intencion ta pa mantene tur persona den servicio, hunto cu un maneho responsabel.

E situacion relaciona cu e pandemia di COVID-19 ta keda un incertidumbre grandi y si e programa pa reduci gasto lo mustra di no ta suficiente, medidanan adicional lo mester wordo implementa.

El a trece dilanti cu e ekipo ta hunga un rol importante den e Tourism Recovery Marketing Plan Committee, guia door di Aruba Tourism Authority bou di instruccion di Gobierno di Aruba hunto cu AHATA y ATSA. Su meta ta pa ta prepara riba kico por haci pa atrae bishitantenan bek na nos isla asina cu e crisis caba.

“Pa awo nos mester tin hopi resistencia, maneha di forma responsabel y tin un sentido comun pa asina nos por yuda otro surpasa e temporada exigente aki. Mi ta convenci cu temponan miho ta na caminda pa nos tur,” Meijs a finalisa.