(NLTimes) – Un grupo di studiante a ocupa e Edificio Academico di Universidad di Groningen (RUG) ayera, despues di un demostracion riba cayanan di e ciudad pa motibo di e escasez di vivienda disponibel pa studiante.

E studiantenan a anuncia cu nan ta bay bandona e edificio di e universidad solamente si, entre otro, cumpli cu nan demanda pa mas vivienda.

Un vocero pa e grupo di accion na Groningen, Shelter Our Students (SOS) a bisa cu tin alrededor di 75 pa 100 studiante den e edificio. Nan kier ‘mantene e ocupacion lo mas safe posibel’, incluyendo door di cumpli cu reglanan di coronavirus. “Pero nos ta bay keda pa awo.”

SOS a organisa un programa cu speaker y tayernan den e edificio.

Segun un vocero pa SOS, e universidad a cera tur porta na e edificio. Hende cu tabata den e edificio ta permiti pa sali, pero no ta permiti ningun persona drenta. Tampoco ta permiti pa e studiantenan ricibi delivery di cuminda, segun e vocero. Tur les, promocion di doctorado y ceremonia di graduacion den e edificio a keda cancela. “Completamente ridiculo. Bo mester djis permiti cuminda drenta. Tur e salanan grandi pa les por ser usa y nos ta laga espacio pa examen. Nos no ta strobando e hendenan aki. Nos ta contra RUG, no contra nan.”

Algun studiante cu ta comparti e preocupacionnan di e manifestantenan no ta contento cu e situacion. “Pa prome biaha den un aña y mey finalmente nos tin les presencial atrobe. Na dado momento, e activistanan aparentemente a logra grita door di e speakernan cu tin rond di e edificio. E ora nos no por a tende e maestro mas, dus nos a bay pafo”, un studiante a keha na RTV Noord.

Pa motibo di restriccionnan di coronavirus na Hulanda, ta efectivamente e prome biaha den 18 luna cu studiantenan di educacion avansa ta atende les regularmente presencial, y no mester join lesnan transmiti online. “Mi tin un les di estadistico, pero mi no por drenta”, un studiante di sur di e pais a bisa RTV Noord. “Mi nunca a experimenta esaki den pasado. Ta bon pa hende lanta contra e sorto di cosnan aki, pero e motodo? Wel, mi no ta gust’e.”

Municipalidad di Groningen y RUG a bisa cu nan ta comparti e preocupacion di e manifestantenan. Consehal di Groningen, Roeland van der Schaaf (PvdA, vivienda) y Hans Biemans di hunta ehecutivo di e universidad ta na e Edificio Academico pa papia cu e studiantenan.

Prome cu e ocupacion, alrededor di 150 persona a subi caya na Groningen den e ‘marcha di esnan sin hogar’ pa pone atencion riba e crisis di vivienda, specialmente entre studiantenan internacional. Centenares di studiante ainda no a logra haya acomodacion e aña aki, maske e aña academico ya a cuminsa.

E manifestantenan a marcha mientras tabata wanta borchinan cu slogan manera ‘vivienda ta un derecho humano’ y ‘winter is coming’ [red: winter ta na caminda]. Tambe nan a grita slogan cu ta laga cla cu nan kier vivienda adecua.

E activistanan a reuni pa alrededor di merdia riba Grote Markt na Groningen y despues a cana na e Edificio Academico. E universidad mes no tabata inmediatamente disponibel na momento cu a tuma contacto pa un respuesta.

Un cantidad di studiante actualmente ta drumi na e shelter di emergencia di e municipalidad y den shelter temporal cu SOS a regla pa nan. E grupo di accion tambe a declara cu algun di nan ta kedando cerca amigo of na sitionan di campamento.

Otro ciudadnan tambe ta confrontando problema cu un escasez di vivienda pa studiante. Na Enschede, por ehempel, entre 400 pa 500 studiante internacional no a haya un camber.