Situacion di Serlimar cada dia ta birando mas pisa. Trahadonan a dicidi di pone nan trabao plat durante dos dia, pa motibo cu nan ta exigi nan derechonan. Ayera diamars mainta nan a lock e porta cu un candal pa asina evita entrada y salida di otro trahadonan.
Segun trahadonan, tin cosnan cu ta pasando den Serlimar cu nan no por acepta mas. Por ehemplo cu nan no tin un Raad van toezicht completo, sino cu ta conforma di un persona so; for di aña 2018 nan no ta hayando uniform; ademas nan a sigura cu e placa di 12,6% cu ta supone di bay pa FASE, e ta bayendo pa paga debe di Serlimar.
Diego de Cuba, presidente di sindicato STA, a splica cu pa via di e malcontento di trahadonan nan a solicita un reunion cu gerencia di Serlimar. Pero e mesun trahadonan a dicidi di tuma accion. Pa e motibo ey tambe nan a manda un carta pa gerencia y ministernan concerni, como di Asuntonan di Labor y di Infrastructura.
Bon dia Aruba a tuma contacto cu minister di Integridad y Naturalesa, Ursell Arends den cual a puntra tocante riba e situacion di Serlimar na e momentonan aki; Bon Dia Aruba no a haya un contesta oficial.
Si por a tuma nota cu el a duna su comentario na otro medionan di comunicacion, indicando cu el a scucha e preocupacion di e trahadonan mirando cu Serlimar ta cay bao Ministerio di Naturalesa. Ademas nan a ricibi e carta cu tambe a wordo manda pa prome minister Evelyn Wever-Croes.
“Ami lo zorg pa cosnan cana di un forma concreto y structural pa loke ta trata Serlimar.” Di mesun manera el a bisa cu despues di scucha e trahadonan su preocupacion, gobierno ta esun cu ta deal cu Raad van toezicht, nan ta deal cu gerencia y gerencia ta deal cu trahadonan.
Di otro banda, Serlimar ayera atardi a informa comunidad mediante un comunicado cu nan servicio pa recogemento di sushi ta keda suspendi te un proximo aviso, pa motibo di accion cu e trahadonan tin na e momentonan aki.
Parkietenbos y servicio di recoge bestia morto ta operando normal y helpdesk di San Nicolas y na MFA di Noord ta habri den nan orario normal.
