Ayera mainta, abogado Anthony Ruiz den representacion di directiva di Club Chines di Aruba a realisa un conferencia di prensa pa trece dilanti un clarificacion di algun incidentenan cu a tuma luga den e club algun luna pasa.

Ruiz a aclaria cu su persona como abogado y e directiva di e club no ta custuma di duna un conferencia di prensa, comunidad Chines ta regla nan mesun asunto y nan no ta gusta publicidad pero mirando varios acontecimiento cu a pasa den ultimo lunanan nan a dicidi di trece esaki dilanti pa medionan di comunicacion y henter comunidad.

Pa ilustra con e caso a cuminsa, Ruiz a afirma cu den e Club Chines tabatin discusion si e club tabata bon maneha y tambe tabatin un otro discusion na unda ta pensa cu William Chengs y Steven Chen miembronan di directiva di e club tabata trece hopi innovacion na e club, como por ehemplo miembronan hoben pa haci actividadnan eynan.

“Pasobra prome tabata un club di hende bieu cu tin power”, pero awor e club kier bira hopi accesibel y e hendenan aki no ta gusta e cambionan cu ta tumando luga” Ruiz a enfatisa.

El a conta cu algun incidentenan a sosode desde luna di februari na unda un grupo chikito miembro di e comunidad Chines di Aruba a haci hopi daño na e comunidad aki den cual nan a atacha e bon nomber y e trankilidad cu tur e Chinesnan cu tin na Aruba.

Tambe nan a wordo confronta cu incidentenan na unda e grupo chikito aki a purba di tuma over e mando di e club cambiando slot di e porta bao forsa, Ruiz a expresa cu Chen hunto cu Chengs y otro miembronan di e directiva di e club lo cual nan a haci den añanan aki ta pa haci e club aki mas accesibel pa tur hende, principalmente pa muchanan hoben cu antes no tabata sinti nan mes bonbini.

Pa via di esaki, Ruiz a bisa cu nan a cuminsa haci actividadnan pa hobennan na unda esey no a cay den bon tera pa e ‘generacion bieu’ cu segun e mesun Ruiz a indica nan no por tabata sa di adapta nan mes na e reglanan nobo y innovacion cu e directiva a implementa den e club.

Di loke a sucede, Ruiz a splica cu tin un grupo cu a funda e luga ey na unda nan ta kere cu pa e motibo ey nan tin tur derecho riba e club, “pero e club aki ta di tur miembro, no di un grupito di cinco of di tres”, Ruiz a expresa.

Asina mes, el a bisa cu e club tin un acta di incorporacion cu a wordo incorpora na notario “cu ta bijbel di con bo ta maneha e luga aki y den cuadro di esey, tur e actuacion di dia 9 di februari, 18 di februari, 20 di februari ta di un di e miembronan cu a ocasiona hopi daño na e club aki”, Ruiz a menciona.

Tocante esaki, comunidad por a recorda cu incidentenan di Club Chinese di Aruba a sali den tur prensa pa lo cual nan a dicidi di no duna declaracion tocante esaki, ademas el a dirigi riba un miembro di e comunidad Chines di fam Zhao cu manera Ruiz a sigura “el a ocasiona hopi daño na e club aki y a desacredita tur e Chines di Aruba, un actuacion cu a causa hopi daño entre e Chinesnan”, y tambe a acusa e directiva di e club falsamente riba hopi cos.

Loke Chen y Chengs ta haciendo na e momentonan aki ta bezig restructurando e asociacion aki pa haciel’e conforme ley, nan intencion ta pa despues di haci e restructuracion nan por bay y otro hende por tuma e mando di e directiva “pero e miedo di nan ta cu e hende cu lo take over back, ta bay kibra tur lo cual nan a logra den ultimo dos aña”, Ruiz a declara.

Pa e motibo ey, nan ta bezig pa haya sa ken ta miembro di e club, ken di nan ta paga contribucion, con nan ta bay yama e asociacion ey “cu tur respet nos no ta bay haciel’e estilo ouderwets, nos bay haciel’e estilo moderno conforme ley”, el a manifesta.

Mirando cu 1 di mei a wordo organisa otro eleccionnan cu segun Ruiz a señala no ta cuadra cu statuut ni cu nada cu lo cual mester a tuma luga prome cu eleccion, esey tabatin e obhetivo di kita Chen y Chengs di e directiva pa pone nan mes na mando, prome nan mester a inventarisa ken ta miembro y ken no ta miembro di e club y cu un eleccion tin cu bay conforme statuutnan di e asociacion, pa motibo cu por ta cu tin hende cu no ta paga contribucion of cu no ta registra como miembro y ta bay vota.

El a enfatisa cu tanto Chengs como Chen no kier keda na mando di e directiva, “nan kier bay y unico cos cu nan kier haci ta pa e club aki mantene lo cual nan a logra den ultimo dos aña y no bay back na e generacion cu ta pensa cu nan ta manda y cu nan por haci y deshaci akiden pasobra nan ta bieu y nan tin respet”, Ruiz a sigura.

Pa via di tur incidentenan aki, Ruiz a afirma cu nan a cuminsa un caso sumario (kort geding) pa declara e eleccion cu a tuma luga dia 1 di mei ultimo nulo y nan a manda esey pa e abogado di e grupo chikito ey.

Aworaki e caso ta na Corte caba, manera Ruiz a informa y tambe el a bisa cu nan a haya un yamada di e abogado di e otro grupo pa drecha e situacion y no laga bin e sentencia, pa via di esaki nan a bay Corte dia 2 di juni na unda nan a haya e sentencia cu ta un process verbal cu ta bisa cu partidonan a yega na otro y a cumbini cu e eleccion di 1 di mei ultimo tabata uno ilegal y cu e supuesto directiva cu ta na mando na e momentonan aki ta ilegal, cu nan mester abstene nan mes di haci tur cos den representacion di e club.

“Nan no mag di actua te ora cu a nos conhuntamente cu e abogado nobo organisa e eleccion di nobo cu si ta bay conforme ley” pa di e manera ey nan por haya sa ken ta miembro di e club y ken tin cu wordo saca como por ehemplo Sr. Zhao, cu segun Ruiz a indica esey ta den proceso caba y nan ta espera cu e club por keda den trankilidad.

E intencion ta pa nan por organisa e eleccion den un periodo di entre dos pa tres luna na unda cu tur hende ta wordo registra y por vota conforme ley.