Dia 17 di november awor lo tuma luga e yegada di Sinterklaas den compania di su Zwarte Piet. Un personahe cu actualmente ta sigui lanta controversia na Hulanda, te hasta cerca di nos na Corsou, unda e grupo Kick Out Zwarte Piet a anuncia cu lo bin cu un protesta.
Pa Minister di Enseñansa, Rudy Lampe, e situacion ta otro na Aruba. Den e caso di Aruba, e mandatario ta haya cu tanten cu pueblo ta mira e funcion y e necesidad, e conclusion di e rapport di Nacionnan Uni dirigi pa Hulanda, no ta valido pa nos na Aruba.
“Nos contexto ta totalmente diferente”, el a bisa. E ta haya cu na Aruba nos no ta conoce e situacion cu a surgi na Hulanda. El a agrega cu Caribe ta conoci como un region unda bo tin tolerancia ehemplar.
Lampe a bisa cu nos den Caribe ta conoci pa ta un region di paz, unda diferente creencia ta convivi y biba den paz cu otro. E hecho aki ta reconoci pa diferente organismo internacional.
“Den Caribe nos ta tolerante cu otro. Nos ta conoce hendenan cu ta bin for di diferente luga,” el a bisa. E mandatario a referi na e caso na Aruba caminda mas cu 100 diferente nacionalidad ta convivi hunto, sin cu nos ta discrimina otro of cu tin racismo, manera e discusion cu tin na Hulanda.
Rapport Nacionnan Uni.
E mandatario a referi na un rapport di Nacionnan Uni riba e topico aki, cu ta concerni na Hulanda, pero no pa Aruba of e partnernan Caribense di Reino Hulandes. “E conclusion di e rapport ey no ta valido pa nos,” Lampe a bisa. Esaki tin di haci cu e contexto cultural ta completamente diferente.
El a splica cu den e contexto cultural di Hulanda, Nacionnan Uni su recomendacion tabata debi na e discusion cu tin riba expresion racista den e sociedad, pero tambe expresion anti migrante. Pues e ta haya cu den e contexto ey, y mirando tambe e presencia di partidonan di extrema derecha na Europa cu a lanta cu filosofia Nazi cu ta destaca cierto rasa, Nacionnan Uni a pidi pa Hulanda bin cu un enfoke diferente.
P’esey bo ta haya cu aworaki na Hulanda nan ta papia di e ‘Piet multi-color’. Esaki a base di e recomendacion cu a bini di Nacionnan Uni. E mandatario a haci uzo di e expresion aki ya cu den e festival di Buki pa Mucha cu ta tumando luga e siman aki, e buki di e festival skirbi pa Richard Dabian ta yama E Faro Multicolor.
