E doorlichting rapport ta remarca e importancia di proporciona legislacion actualisa y adecua. E grupo di trabao encarga cu e investigacion a referi cu na momento di observa e Ordenansanan Nacional, a papia hopi di un legislacion cu ta desactualisa y mayoria di ley ta bay back na decada 1980 y no a wordo modifica recientemente.
E Ordenansanan Nacional (landsverordeningen) ta e fuente di derecho, pero nan no ta e unico forma cu tin di norma huridico. Ademas di esaki, ta existi decreto nacional cu ta contene medida general y reglamento ministerial cu ta contene norma generalmente vinculante.
Ta existi tambe tratado internacional of decision di organisacion internacional, manera entre otro Union Europeo, cu por contene tambe regulacionnan generalmente vinculante.
E legislacion cu ta trata educacion ta estableci actualmente den e siguiente Ordenansa Nacional cu e Decreto Nacional asocia: Ordenansa Nacional di Educacion Infantil; Ordenansa Nacional di Educacion Primario; Ordenansa Nacional di Educacion Secundario (esaki ta inclui EPB, EPI, VAVO, IPA); Ordenansa Nacional di Universidad di Aruba; Ordenansa Nacional Educacion Obligatorio; Decreto Nacional di consulta di personal di docente organisa; Decreto Nacional tocante retribucion di personal di docente.
E grupo di trabao a destaca specificamente tres punto, apart di e problema general di legislacion. E prome punto ta tocante e legislacion di educacion superior. Aruba tin dos institucion di educacion superior cu ta subsidia pa gobierno, Instituto Pedagogico Arubano (IPA) y Universidad di Aruba (UA).
IPA ta un instituto publico di formacion ariba nivel di HBO. IPA ta capacita e studiantenan pa nan bira docente di educacion primario y docentenan di educacion secundario. E ta ofrece tambe e curso Pedagogisch Didactisch Getuigschrift (PDG), un curso di mita tempo pa studiantenan cu kier bira docente of capacitadornan.
Universidad di Aruba ta un institucion di educacion superior cu ta un di e poco institucionnan cu ta ofrece titulonan universitario. UA ta ofrece principalmente programanan di formacion profesional superior den diferente facultad.
Den termino di legislacion, Universidad di Aruba actualmente ta cay bao e Ordenansa Nacional di Universidad di Aruba. IPA, di otro banda, ta cay bao e Ordenansa Nacional di educacion secundario. E dos institucion di educacion superior subsidia pa gobierno ta goberna cu norma legal diferente.
E grupo di trabao ta destaca cu e situacion aki ta obviamente indeseabel y mester tin un regimen legal pa educacion superior.
E segundo punto cu e grupo di trabao a trece pa dilanti ta referi na e formacion profesional. Actualmente no ta existi un legislacion specifico pa loke ta trata formacion profesional. Na Aruba tin un institucion di educacion vocacional secundario, Colegio EPI. e institucion aki tambe ta cay bao e Ordenansa Nacional di educacion secundario.
E di tres punto ta relaciona cu e posicion legal di Inspectie Onderwijs. Na Aruba actualmente ta existi solamente un proyecto di ley di supervision di educacion. No ta existi un Ordenansa Nacional definitivo ariba cual por actua. E grupo di trabao ta enfatisa cu e legislacion tocante supervision di educacion ta un condicion importante pa Inspectie Onderwijs por realisa su tarea di control, cu un base legal y garantianan asocia.
Un recomendacion importante cu e grupo di trabao ta trece pa dilanti ta un evaluacion di e legislacion educativo vigente y adapta esaki na e rekisitonan di e tempo actual. Den cualkier caso mester presta bon atencion na e garantianan suficiente y e independencia di tur e partidonan involucra, esaki ta inclui e directivanan, e supervisornan interno, supervisornan externo y e minister.
Banda di esey nan ta remarca ta importante pa fortalece e marco legal di educacion superior. E grupo di trabao ta propone e desaroyo di un ley adapta na educacion superior den cual ta posiciona e dos actornan principal di educacion superior na Aruba, IPA y Universidad di Aruba.
Di e manera aki ta establece un base pa un vision di educacion superior. A largo plaso esaki tambe por habri caminda pa un desaroyo di un hungado poderoso den educacion superior a traves di un integracion real mas grandi di Universidad di Aruba y IPA. Esaki a wordo purba caba antes, pero particularmente e diferente posicionnan legal y tambe e diferencianan relaciona cu e posicion legal a impedi un fusion exitoso na e momento ey.
E grupo di trabao ta subraya cu ta importante tambe pa evalua e legislacion actual pa educacion vocacional secundario y evalua si e legislacion pa loke ta trata educacion vocacional ta wordo refleha suficientemente den e Ordenansa Nacional di educacion secundario of si ta necesario desaroya un legislacion separa pa esaki.
Por ultimo, nan ta destaca cu ta importante pa Inspectie Onderwijs ricibi un mandato claramente formula den forma di un marco di supervision y un posicion legalmente hancra. Parti di esaki ta e norma- y condicionnan legal cla ariba e base cu e inspeccion por tuma luga y ora cu ta necesario, e sancion. Den e contexto ey ta importante pa e Ley di Supervision Educativo wordo formalisa desde proximo aña pa e por drenta na vigor.
Na 2022 Aruba a nombra un lider di proyecto pa organisa y realisa un actualisacion di e legislacion educativo. Den e proyecto aki, e atencion ta enfoca ariba ahusta e marco di e legislacion educativo, e Ordenansanan Nacional. Di e manera aki por establece un base sostenibel pa legislacion educativo.
Lo establece varios grupo central pa e proyecto, cada un lo traha cu nan propio Ordenansa Nacional. Pa cada tipo di educacion, diferente persona ta participa den e grupo central corespondiente, incluyendo oficialnan di politica di DEA, huristanan di DEA, huristanan di DWJZ y un inspector di Inspectie Onderwijs.
