Durante un conferencia di prensa extraordinario, minister presidente, Evelyn Wever-Croes hunto cu Minister di Finanzas y asunto Economico, Xiomara Maduro, a anuncia otro prestamo sin interes ‘zachte lening’, otorga pa Hulanda pa asina pais Aruba por atende finacieramente cu e crisis actual di e Coronavirs/Covid.

Ta asina cu despues di e reunion di conseho di minister di Reino a keda conoci e di tres ‘zachte lening’ pa Aruba. A aproba e suma di 113.3 miyon florin pa e periodo di 15 di mei pa 3 di juli, kiermen pa seis siman. Ya caba na bispo di e reunion di conseho di minister di Reino, premier Wever-Croes a mustra su positivismo tocante e ortogamento di e prestamo aki. El a bisa cu e fiansa aki ta parti den dos componente. E prome ta consisti di 69.9 miyon pa cubri e necesidad di likides di gobierno y 49.4 miyon pa subsidia salario.

Sinembargo e decision di otorgamento di e fiansa aki no a bay sin mas. Hulanda a bin cu condicion mas pisa den direccion cui gobierno mester sigui cu un medida mas stringente di baha gasto. Un condicion ta cu mester corta e luna aki ainda cu 5 miyon florin den gastonan di AZV. No ta un decision facil meymey di e pandemia actual, y gobierno lo traha un plan pa por garantisa e servicio di e seguro di malesa.

Igualmente Hulanda a expresa su disponibilidad pa sigui presta Aruba placa sin interes pa termino largo, pero bao cierto condicion mas estricto pa cumpli cune.

E placa aki di 113.3 miyon florin ta destina pa e proyectonan di FASE, subsidio di salario y cierto gastonan di Gobierno. E fiansa sin interes aki no mester wordo paga prome cu 1 di mei di aña 2022. E placa di 69.9 miyon lo wordo pasa riba cuenta di Banco Central inmediatamente. Esaki cu excepcion di e subsidio di salario pa luna di juni.

Prome cu e suma di 49.4 miyon pa subsidia salario lo wordo pasa, Hulanda kier pa CAFT aproba prome e convenio cu dunado di trabou y trahadonan a bay di acuerdo cu ne durante e ultimo Dialogo Tripartiet Social Laboral. Segun gobierno a informa den e Dialogo Tripartiet aki nan a cumbini cu e trahado tambe lo entrega 20% di su salario. Unabes cu CAFT ta duna su aprobacion, Hulanda lo traspasa e placa pa subsidio di salario por wordo paga fin di luna.