Pa mas siguridad pa comunidad y pa sector turistico proyecto di camara ta continua den area di Eagle Beach

Pa percura cu tin mas siguridad pa e comunidad y tambe pa e sector turistico, sector priva ta yudando na unda un di stakeholders ta colabora cu coriente y cu internet pa e proyecto por avansa un poco mas lihe.

Segun Jurgen Schaijk ken ta fungi como director di Amsterdam Menor Beach Resort e siguridad ta den top 3 di cada turista cu kier bishita un destino, si nan ta bin Aruba nan ta bin pa e beachnan, solo, servicio y atencion pero tambe pa e siguridad, igualmente pa comunidad local unda si un incidente ta sucede, esey por ser graba y por yuda pa preveni di tin menos criminalidad.

“Aruba ta un destino hopi sigur y nos kier mantene esey,” Schaijk a bisa y tambe a agrega cu parti di e siguridad ta e sistema di camara pero e realidad ta cu e mesun hende tambe por reporta na Cuerpo di Polis algun situacion cu no ta bon y nan por actua.

Riba e rotonde di turtuga na Eagle Beach ya caba a instala un sistema di camara di siguridad e cual tin un plataforma sofistica cu ta graba y tambe por haci un analisis di cada imagen cu a keda graba pa Cuerpo di Polis por tin un par di herment extra cu por yuda den cualkier caso cu lo presenta.

Pa esaki por funciona, mester di diferente componente manera coriente y internet y pa e motibo ey nan a acerca un di stakeholders cu ta Amsterdam Menor e cual a yuda pa e proyecto por cana mas lihe y nan por haya e infrastructura pa nan por coloca e camaranan.

Minister di Husticia, Rocco Tjon, a sigura cu ta satisfecho di por mira e avance di e proyecto aki y aworaki nan ta den ultimo fase unda nan ta colabora cu sector priva caminda no tur gasto ta cay pa gobierno, “e proyecto aki ta di un magnitud grandi cu ta consisti di diferente fase na unda tin e area di hotel cu banda di lama y hotzone ta ekipa cu camara caba.

Aña pasa a cuminsa na San Nicolas e cual a haya camaranan cu tambe ta ser usa pa e temporada aki di Carnaval manera e mandatario a señala cu esey ta pa motibo cu temporada di carnaval, ta uno sumamente druk pa Cuerpo Policial, pa e motibo ey, ta percura pa facilita nan trabou, a traves di e camaranan di siguridad. Pues, na un manera mas eficiente y eficaz, nan por wordo dirigi na momento cu esaki capta señalnan cu tin cierto disturbionan pasando. Di otro banda a traves di e camaranan aki, nos ta garantisa mucho mas siguridad pa tur e mirones cu ta bay gosa di carnaval.

E camaranan pa districto di Oranjestad a yega Aruba caba y ora cu Carnaval lo finalisa e trabounan di instalacion ta bay cuminsa, tur e fase aki ta bin hunto caminda e Operation Command Center cu ta bay maneha tur e imagennan di e camara di siguridad probablemente lo keda cla na april. Di e forma aki lo asisti Cuerpo Policial y demas departamentonan hudicial den no solamente resolve crimennan cometi, pero tambe preveni y mitiga.

Tambe a informa cu nan tin cerca di 40 luga strategico na Savaneta cu tin camara caminda di e forma aki nan por combati criminalidad, na e momentonan aki nan ta den ultimo fase unda nan ta bay sigui expande e proyecto door di colaboracion cu sector priva, den esaki minister Tjon a comenta cu tur entidad of organisacion cu tin e peticion pa camara, por haci esey den un colaboracion unda nan ta inverti y gobierno ta percura pa e vigilancia di e camara ta disponibel 24 ora pa dia.

Proyecto di camaranan ta algo hopi necesario mirando cierto casonan di criminalidad cu a tuma luga for di algun tempo, pa e motibo ey for di 2022 a bin informando tocante diferente iniciativa pa por yuda combati criminalidad na unda cu Setar tabata un escogencia logico pa e proyecto aki, mirando cu den pasado intentonan a ser haci pa por cristalisa e tipo di proyectonan aki, pero nunca a ser concretisa por completo. Semper tabata tin cierto retonan pa concretisa un proyecto asina, y ora a wak e “track record” di Setar caminda ya caba a ehecuta tipo di proyectonan manera esaki, exitosamente, pa companianan di magnitud manera Aeropuerto, e decision tabata logico pa bay di acuerdo cu e oferta cu a ricibi di Setar.

Igualmente, a informa tocante e borchinan cu a ser instala den e area hotelero pa anuncia cu e area lo ta bou di vigilancia di camara, y na mes momento tambe a percura pa “infomercials” ser publica, pa asina conscientisa pueblo di Aruba en general cu e area ta bou di vigilancia.

Importante ta pa menciona cu, criminalidad, ta algo cu ta desaroya den diferente forma rond mundo, y sigur no ta algo cu por wordo elimina por completo, y pesey a base di estudionan, informacion, inteligencia y partnerships solido cu demas paisnan, nos lo sigui inverti den tecnologia pa asina preveni y mitiga mas cu ta posibel.