Jose Sanchez di 74 aña di edad di nacionalidad Venezolano ta desaparecido for di mas di un siman caba unda cu for di dia 26 di november su amigonan y bisiña a cuminsa cu su buskeda mirando cu e ta sufri di e condicion di Alzheimer.

Diasabra ultimo un grupo di su amigonan a señala na e medio di comunicacion Noticia Impacto cu Sanchez tin mas di un siman cu ta perdi y nan ta preocupa pa motibo cu ta un hende grandi cu ta biba su so den su cas y cu e no tin famia na Aruba.

Ta p’esey cu nan a dicidi di bin dilanti pa asina ey informa comunidad tocante e desaparicion di e persona aki caminda nan ta esun cu ta percura pa Sanchez por ricibi su cuminda tur dia, tabata diasabra 26 di november manera a conta cu nan a bay hiba su cuminda y e persona no tabata den su cas, mesun situacion a pasa diadomingo ultimo ora nan a wak e cuminda intacto riba mesa y e cas tabata habri.

Ultimo informacion cu nan a haya ta cu nan a mira Sanchez den e area di Ponton pero e ta biba na Matadera pa loke nan ta opina cu e meneer por ta den area di Noord, nan ta solicita na comunidad si a wak un persona masculino di un haltura di 1.60 cu color di cabey shinishi of blanco e cual tabatin bista un pechi preto cu un T-shirt cloro berde cu blauw y cu un carson cu cuadro blanco y preto pa por fabor yama na e number di telefon 911, 100 of 731.4191

“Nos ta hopi preocupa pa nos amigo Jose cu no tin famia aki, e ta sufri di Alzheimer cu ya desde aña 2015 el a cuminsa perde su memoria, kiermen nos no sa si el a come, si ta drumi y p’esey nos ta pidi na ciudadanonan di Aruba pa yama nos si boso por mir’e”, nan a sigura.

Segun nan a señala, Cuerpo Policial ta yudando den e buskeda di Sanchez unda a menciona cu nan ta haciendo un bon trabou y Fundacion di Alzheimer taambe ta cooperando den esaki pa asina por haya Sanchez.

Nan tambe ta conta cu nan a bay cu nan auto recoriendo e area, nan a busca den mondi y cu nan ta sigui cu e buskeda, un di nan ta señala cu ora el a papia cu Sanchez ultimo biaha “den su cabes e tabata na otro estado na Venezuela, e tabata kier bay cerca su mayornan cu nan no t’ey mas, dus e ta den un otro epoca, dus si algun di un ciudadano por topa cune, at least por purba di papia cune y si por manda un potret di dje pa confirma cu si ta e pasobra pa algun biaha e por wordo confundi cu otro hende”, nan a bisa.

Igualmente, el a comenta cu e meneer door di su condicion ta papia Spaño aunke e tin mas cu trinta aña na Aruba pero su memoria a wordo perdi door di Alzheimer y cu e no ta un persona agresivo.

Despues di mas di ocho dia di desaparecido e por ta den cualkier area di e isla ya cu e por ta canando pa loke nan ta pidi pa cualkier ciudadano si por tira un bon bista riba caminda unda por topel’e.

Nan a sigura cu nan a haci un buskeda den area di Palm Beach, Noord y Matadera caba unda algun bisiñanan a afirma cu por a wak Sanchez pero su amigonan a busca y no a haya e persona aki.

Door cu e persona ta sufri di e condicion Alzheimer den cual hende grandi e mayoria di biaha ta perde memoria nan ta acerca comunidad pa yuda den e buskeda di Sanchez ya cu hopi dia a pasa caba y nan no sa con su condicion fisico por ta na e momentonan aki.

Nan como su amigonan y bisiña a traha flyer y durante fin di siman ultimo y nan a busca na diferente caminda sin cu por haya Sanchez.