ORANJESTAD – Reina Beatrix baisschool hunto cu MAVO Juliana School ta scolnan cu pa par di aña ta cera y bandona. Ambos ta scolnan cu tabata conoci den comunidad y segun comentario di hende, ta un lastima cu ta wak nan cera y no activo.
Bon Dia Aruba a puntra minister di enseñanza, ciencia y desaroyo sostenibel, Rudy Lampe (RED) kico ta bay pasa cu e scolnan aki, mirando cu ya caba tin tanto tempo cera y nada no ta wordo haci. Tin plan pa traha riba edificio of e ta bay wordo destrui?
Lampe a contesta cu no ta den nan plan pa destrui ningun di e dos edificionan. E ta continua splica cu aña pasa, nan a haya nan mes den un situacion dificil cu e scol Bonifacius, cu nan mester a sloop pa motibo cu tabata tin casi 7 aña cera bou di gobierno anterior.
E mandatario a agrega cu e edificio a bira un ruina, anto pa e motibo ey no tabata tin otro salida. “E tabata un decision responsabel, mirando cu e edificio tabata asina zwak caba, henter e structura. No tabata tin otro alternativa”, minister a splica. Pa e motibo ey, a destrui e scol aki.
Segun Lampe, ta bay pasa mescos cu otro scol, Sint Aluisius School na Noord. E structura, segun e mandatario, ta asina malo, cu a renoba e scol aki varios biaha y ainda asina despues di par aña e ta keda sin por wordo uza.
Lampe a bisa cu conseho di expertonan pa e situacion di e scol aki ta pone cu lo bay sloop den pas vakantie, si tur cos keda cla. E ta remarca cu e ta pa evita e molester cu tin banda di e scol, tambe manera e misa na Noord.
Pero pa locual ta trata Reina Beatrix School, e mandatario ta bisa cu e ta un monumento reconoci, pues no ta facil pa destrui e edificio. Juliana School no ta un monumento, pero no ta den plan pa basha e edificionan aki abou.
E nomber di ambos scolnan si ta wordo uza ainda, pero den diferente sitionan na Aruba. Ex alumnonan di ambos scol ta bisa ta un lastima pa wak e edificio unda a pasa nan infancia y hubentud bay perdi asina, pa motibo di no haci renobacion y kita e asbest cu tin na ambos scol.
