Di un cantidad di 3200 dunado di trabou cu pa luna di juni a bin na remarke pa por aplica pa e programa Subsidio di Salario, 1663 a haci uzo di e oportunidad. Cu esaki por bisa cu pa luna di juni alrededor di 22.800 di trahadonan a keda cubri cu un garantia di pago parcial di nan salario pa un suma di 40.7 miyon florin.
SVb ta controlando tur e formularionan Akkoordverklaring Vermindering Arbeidsomvang cu e dunadonan di trabou mester a yena y entrega pa e luna aki. Lo tuma contacto cu mas o menos 300 dunado di trabou cu no a yena e formulario corecto of completo pa brinda nan e oportunidad pa coregi nan eror. Despues di esaki ta premira cu pa diaranson awor ta cuminsa cu e transferencia di e suma di subsidio di salario pa e dunado di trabou cu tabata tin cos na ordo y ta sigui despues cu esunnan cu mester a drecha e formulario Akkoordverklaring Vermindering Arbeidsomvang.
SVb ta recorda tur dunado di trabou cu e ta su responsabilidad pa percura cu su informacion bancario ta registra corectamente na SVb. Si esaki no ta e caso, e por resulta den retraso innecesario den pago di e subsidio di salario.
Pa facilita e dunado di trabou y brinda e ayudo mas lihe posibel e Subsidio di Salario ta wordo paga den forma di un adelanto (na Hulandes un voorschot) a base di e perdida di entrada di benta premira pa e dunado di trabou pa luna di mei. Despues lo controla y fiha e suma di subsidio a base di entrada di benta real di e dunado di trabou pa luna di juni.
Dunadonan di trabou cu ainda tin pregunta relaciona cu e programa Subsidio di Salario por sigui manda nan pregunta pa e Service Center na loonsubsidie@svbaruba.org.
