Durante algun tempo pasa a keda conoci problemanan den Departamento di Integracion , Maneho y Admision di Stranhero (DIMAS) pa loke ta trata permisonan y den caso aki prome minister demisionario a compromete su mes di cuminsa investiga kico ta sosodiendo den e departamento aki.
Dianan pasa, un caso specifico a bin dilanti na unda un persona a haci un denuncia indicando cu den e departamento aki ta existi cierto iregularidad como corupcion y cu personal ta haya placa extra pa haci nan trabao, den e acusacion tambe e persona pidi pa prome minister demisionario Evelyn Wever-Croes pa pone ordo y control ya cu stranheronan ta esunnan cu ta wordo afecta cu e hecho aki.
Di su parti, Wever-Croes a contesta e denuncia aki na unda el a indica cu el a tuma e denuncia hopi na serio pa motibo cu segun el a sigura, e incidentenan aki ta viola e derechonan basico di e personanan “esaki ta cosnan cu nos no ta acepta”, el a declara.
Ademas, el a afirma cu lo cuminsa un investigacion pa haya sa si e denuncia aki ta cierto pa asina nan por actua, di mesun manera tambe a keda conoci cu DIMAS y DPL for di algun tempo no ta trahando bao e mesun linea loke ta causando hopi problemanan pa esunnan cu ya caba ta biba na Aruba desde añanan pasa.
“Nos tin algun ideanan pero e minister cu lo encarga cu integracion, ta e minister cu tin cu busca un solucion y maneho pa atende cada un di nan”, el a sigura.
Ademas, el a enfatisa cu den Acuerdo di Gobernacion cu recientemente a wordo firma pa partidonan MEP y Raiz el a bisa cu e trato pa personanan mester ta husto y mester respeta derechonan humano di tur hende.
Tambe, Wever-Croes a expresa cu den otro documento lo tin mas detayenan riba diferente puntonan den un margen cu nan kier pa e proximo minister di integracion lo bay atende cune, loke nan kier evita ta cu despues di firma acuerdo por bin un otro maneho di un persona so y no di un gabinete completo, manera mester ta segun el a menciona.
