Leakmento di informacion di crimen di asesinato ta algo confidencial y hopi delicado. Bon Dia Aruba kier trece dilanti un documento unda ta mustra con un ex-funcionario di e mesun Cuerpo Policial di Aruba tabata duna informacion na un miembro di prensa di varios caso di asesinato cu a sucede na Aruba.

Den un estado di derecho unda husticia ta funciona, e polis en cuestion aki, cu mester a keda como e unico voz di e victimanan di asesinato, a bira un informante cu a perde su trabao poniendo Cuerpo Policial su credibilidad na suela.

Door di un investigacion den pasado den cual a confisca un miembro di prensa su telefon pa un otro caso penal, na momento cu a analisa e telefon a bin haya combersacionnan di WhatsApp entre e periodista y e ex-funcionario aki, cu tabata traha den departamento forensico di BFTO.

Caso 1: De Vuyst

A comproba cu e ex-funcionario a comparti varios mensahe di WhatsApp tocante e crimen cometi na De Vuyst na aña 2017. Den esaki el a sigura cu el a comparti informacion cune mirando cu e tabata considera e periodista su amigo y tabata confia den dje. El a splica cu e tabata sa cu e tabata haciendo algo malo, pero esey no tabata su intencion.

Den e mesun caso aki di asesinato, e periodista aki a haci preguntanan morboso na e ex-funcionario, como por ehemplo, na unda y con a haya e curpa di e victima, si el a muri cu su wowonan cera of habri, si tabata cubri cu sanger y si e persona of personanan cu a comete e asesinato a abusa analmente di e victima, si e victima tabatin un paña riba su cabes y si e victima a grita of a defende su mes prome cu el a wordo mata. Tambe e periodista a puntra e ex-funcionario si e tabata kier agrega algo mas pa por skirbi den articulo, si por usa e palabra psicopata y si e curpa a keda entrega na famia caba.

Caso 2: asesinato di ex-polis

E ex-funcionario a transmiti informacion tocante un incidente cu a sucede dia 3 di juli 2017, unda un ex-polis a fayece. El a señala cu su propio ex-colega tabata permanece na e luga, cu ki tipo di bloki su ex-colega a wordo golpia y cu e sospechoso a haya un bala den su lomba.

Caso 3: suicidio na hospital

Na juni di 2018 nan tabata papia di un caso di suicidio na hospital, unda e periodista a manda mensahenan di voz bisando “e mesun forense a bin”; pero e ex-funcionario a bisa e periodista cu e no tabata na e luga y a pidie pa no papia di e tema, debi cu por a keda descubri cu ta e tabata su fuente.

Caso 4: caso Ski

Dia 20 di augustus 2018 e ex-funcionario tambe a duna informacion na e periodista di un persona cu a fayece y ken dianan prome a haya un tiro na pia. El a bisa e periodista cu e curpa a wordo tuma den beslag, pero el a bisa tambe cu “nos a pensa cu pa via di e mal cuido el a fayece.”

Esaki ta algun di hopi caso di leakmento di informacion delicado y confidencial di sucesonan di Aruba cu a costa mas cu ocho miembro di Cuerpo Policial di Aruba nan funcion, pa motibo cu nan a comparti informacion y a bende propiedad di Cuerpo Policial.

Bon Dia Aruba kier ilustra cu fuentenan periodistico na Aruba tin un balor vital pa e democracia y pa e mesun periodista. Pa loke ta trata informacion delicado periodistanan responsabel hamas no lo usa aplicacionnan manera WhatsApp pa comunica cu nan fuentenan, mirando cu ta trata di informacion valioso y delicado. E meta periodistico hamas ta pa perhudica un caso penal andando. No ta tur informacion por wordo publica mirando cu por pone den riesgo e fuente y un investigacion, lo cual a wordo haci den e caso specifico aki unda e ex-funcionario a perde su trabao y su credibilidad.

Nota di redaccion: E documento aki no ta papia ni tin relacion cu un ni ngun miembro di redaccion di Bon Dia Aruba.