Camara di Comercio di Aruba (KvK) lo traha conhuntamente cu otro partner pa trece innovacion den e forma di haci negoshi riba nos isla. Nan a yega di reuni cu Banco Central di Aruba (BCA) y banconan local riba e tereno di e-commerce y pa formalisa un sistema di pago online.
Tambe KvK a tene reunion cu gobernador di Aruba y diferente departamento gubernamental manera Enseñansa, Impuesto, asunto economico y labor pa crea e enlace pa brinda mas posibilidad comercial pa e empresarionan.
Eliminacion di check
Presidente di e gremio comercial aki, Ernst Mohamed a bisa cu e-commerce a bira e futuro pa comercio. E echo cu Asociacion di Bankeronan di Aruba a anuncia cu tur banco a dicidi di anula e uzo di check, ta un decision di nan, y KvK ta apoya nan ya cu nan kier bay mas riba e forma di pago via internet y menos cash den circulacion.
Sr. Mohamed a laga sa cu si nan clientenan ta haci nan transaccionnan via internet of via bank to bank, tin menos chens pa atende cu e problemanan di bounce check of placa falso, etc.. E ta kere cu den e fluho ya sea di check y placa cash semper bo tin cu atende cu un porcentahe cu ta dificil pa recupera nan pa un motibo of otro. Si e check no pasa e comerciante ta perde y tambe banco tin cu cubri nan mes.
Pero igualmente e ta haya cu e paso aki pa elimina e uzo of circulacion di check ta un paso pa futuro. Segun KvK tur hende por purba si ta mas facil di paga via banco ya cu awor banconan a bin cu un app of aplicacion pa facilita e proceso di pago online. Si e persona no tin e fondo suficiente den su cuenta bancario, e pago no por bay. E ta contrario na loke tabata sosode cu e uzo di check. Kiermen “e siguridad di ami como comerciante di por haya mi placa ta mas miho cu si mi ta haya un check cu mi tin cu warda dos dia pa clear.” Den caso cu e check no ta clear e tin cu pasa full un proceso.
Pero segun presidente di KvK- pa medio di introduccion di e sistema di pago via internet cu nan ta trahando pa haci direct, e ta trece mas siguridad. Pues den e caso aki si bo ta cumpra algo y bo ta paga via e sistema aki, como comerciante e sa cu e ta haya e placa di biaha pasobra bo mester tin fondo pa e pago por bay.
Menos cash
El a reitera cu e uzo di tecnologia ta e futuro y banconan local tabata coriendo atras di locual ta progreso. Aunke e eliminacion di check ta mustra mas drastico, e ta haya cu esaki ta un forma pa forsa tur hende pa bay na unda nos mester ta caba riba implementacion y uzo di tecnologia den mundo bancario.
E miembro di e board di KvK, Kawish Misier kende ta un empresario hoben a bay recientemente na China. El a relata su experiencia cu den e pais Asiatico aki no tin casi cash money mas. Tur hende ta paga via un app movil of celular.
Segun sr. Mohamed, esey ta futuro y nos tur mester adapta nos mes na e evolucion of cambio aki a pesar di e gap di un generacion jong pa un generacion mas adulto. E ta haya cu tur hende mester adapta su mes na e tipo di cambio aki, ya cu aki poco tempo no tin cash mas ‘Bo tin cu prepara bo mes’ pa atende cu e pago di nan compromisonan y otro asuntonan.
E ta kere cu akinan gobierno y muy specialmente enseñansa tin un tarea pa prepara tur hende riba locual ta biniendo, haciendo uzo di computer les barata y cu smart phone pa nan siña con pa uza nan di un forma adecuado na nan necesidadnan. Di otro banda e ta contento cu miembronan di OPPA ta activo riba uzo di tecnologia ya sea cu smart phone y computer.
