Presidente di Parlamento Juan ‘Adi’ Thijsen (MEP) ta splica cu e proceso pa pasa e ‘invoeringsverordening’, unda ta haci union civil posibel pa parehanan hetero y homo — memey un cantidad grandi di otro cambio — mester pasa dos biaha via departamento huridico DWJZ y bin bek parlamento prome cu e por yega na su ronda final pa bira ley oficialmente. Thijsen a comenta cu e no por papia pa otro parlamentario, pero e no tin duda cu e ley aki lo pasa ora e proceso largo termina.

Manera hues a dicta antayera den un caso entama pa un pareha di dos persona femenino y Fundacion Orguyo Aruba, gobierno ta actuando contra ley den e sentido di articulo 8 y 14 di EVRM (Declaracion Europeo di Derecho Humano) por medio di no laga e pareha casa segun codigo civil buki 1 articulo 1:31 of pa ofrece un alternativa (union civil). Den e caso ta referi tambe na e echo cu desde 2016 no a introduci e cambionan necesario pa haci union civil posibel, cual lo trece cune derechonan igualitario huridico pa parehanan di mesun sexo, manera por ricibi un subsidio di viuda ora un hende su casa fayece, manera Ret Karibense a raporta aña pasa.

Nos a pidi Prome Minister Evelyn Wever-Croes (MEP) su comentario riba e proceso largo, y e prome mandatario a indica cu esaki ta den man di Parlamento y cu mester respeta cu Parlamento su rol como poder legislativo pa esaki cana su caminda.

Combersando cu Bon Dia, Thijsen ta splica cu e trayectorio pa introduci e ley aki tabata asina largo pasobra ora ta trata di un codigo civil, cual por encera un cantidad di cambio grandi, mester pasa e cambionan via un invoeringsverordening (lesa: ley pa introduci cambionan den un ley). Kiermen cu desde cu a aproba e cambionan aki, ta manda esaki pa departamento huridico DWJZ (Directie Wetgeving en Juridische Zaken), cual tin cu traha un rapport riba tur e cambionan. Esaki ta bay bek Parlamento, segun Thijsen, pa Parlamento duna su anotacionnan, y e ora ey e ta bay bek pa DWJZ. Unabes esaki pasa, DWJZ ta traha un rapport adicional (naderrapport) basa riba e anotacionnan di Parlamento. Finalmente e ta bay bek pa Parlamento pa na final trat’e y pas’e oficialmente pa gobernador y gobierno pa e bira ley.

‘No tin duda cu e ley [pa entre otro introduci union civil] lo pasa’
Bon Dia a haci e pregunta si den e proceso aki por cambia di opinion y dicidi pa no pasa e ley. Di loke por a compronde di Thijsen su splicacion, aunke esaki teoreticamente ta posibel, e presidente tin duda cu esaki lo pasa. Entre otro, pasobra si mira cu gobernacion y tambe e proceso di traha ley mester tin continuidad, no ta rasonabel pa rechasa e cambionan despues. Ademas, mirando cu tin un cantidad di cambio grandi importante cu mester tuma luga den buki 1 di codigo civil, Thijsen no ta mira cu lo bay tranca cambionan necesario pa un cambio cu compara cu su totalidad ta algo chikito. P’esey aunke Thijsen no por papia pa su coleganan, cual hopi di nan ta nobo y no a tuma parti den Parlamento su constelacion anterior manera Thijsen, e no tin duda cu e ley lo pasa.

Tur tres isla den Reino tin capacidad legislativo abou.
Manera cu Minister di Husticia Andin Bikker (POR) a yega di trece dilanti hopi biaha, na Aruba e cantidad di persona cu ta specialisa den e tecnicanan legislativo pa traha ley, ta scars. Esaki kiermen cu Aruba tin un capacidad legislativo abou. Pa e rason aki e minister kier cuminsa un academia di ley unda ta siña e tecnicanan aki. Mientrastanto Thijsen a hasta indica cu a haci varios apelacion na Aruba su partnernan den Reino (Corsou, Sint Maarten y Hulanda) pa colabora riba e tema ki, mirando cu tur isla tin capacidad legislativo debil y por uza reforsamento di Hulanda, unda tin hopi mas persona cu tin e experticio specifico riba tecnica legislativo.

Maske cu Bikker a yega di declara na Bon Dia cu e ta spera cu pa fin di 2019 tabata spera di a finalmente manda e ley aki parlamento pa aprobacion, ta mustra cu tin rasonnan valido pakico esaki no a pasa ainda. Bikker mes a declara anteriormente cu aunke e cambio di union civil ta solamente un parti chikito di henter e ley, e ta keda algo importante ‘pa varios persona sigur’.

Comments are closed.