Siman pasa a keda anuncia cu diabierna awor dia 20 di augustus tur scol lo habri, pero e fecha aki a keda cambia.

Tentativamente e ta bira awor dia 3 di september, asina representante di cluster 4 di crisis team, Glenda Hernandez a anuncia dialuna anochi.

Esaki ta implica cu tanto e muchanan y hobennan di scol mester keda na cas. Tin mayor cu no por a spera e cambio sorpresivo aki, pero ‘den un crisis conta cu e situacion por cambia di un minuut pa otro. P’esey nos ta yame crisis!” segun Hernandez. El a pidi cooperacion y comprension pa e decisionnan cu nan a tuma den seno di crisis team.

Cambio di fecha

E cambio di fecha aki ta debi cu nan a ripara cu tanten temponan ta pasa, e casonan di Covid ta aumenta y no ta baha. E no a sosode manera a wordo pronostica inicialmente ora cu nan a opta pa e fecha di dia 20 di augustus.

Ayera atardi DVG a informa cu tabatin 924 caso activo di Covid. Sinembargo e casonan ta aumenta y nan ta sigui aumenta y no ta baha. Ademas si nos no ta frena e subida aki, nos por haya confronta den un linea fini entre biba y morto entre esnan victima di e virus aki. Logicamente nos no kier yega na e situacion ey, specialmente pa nos hendenan di edad y pashentnan di halto riesgo, ya cu Aruba ta consisti di un grupo grandi di hendenan cu problema di malesa cronico.

Di un banda ta bon pa e muchanan di scol por tin contacto social, y esey tabata e pensamento cu tambe a inspira crisis team pa bin cu un apertura di scol e luna aki mes. Pero tambe nan kier tin un bista directo, ora cu nan ta habri scol, di e problemanan social di e muchanan den nan cas. Un biaha mas, Hernandez a laga sa cu e indice di problemanan social ta “basta halto.”

Reunion

Ya caba prome cu crisis team a tuma e decision di pospone e fecha y apertura di aña escolar nobo, nan a papia cu e directiva di scol. Ayera tambe nan tabatin un reunion cu sindicato SEPPA y SIMAR, tocante e decision aki. Encuanto e dia cu supuestamente scol lo habri, e directiva por haci palabracion cu nan personal of maestro di scol. Nan lo papia cu e veld di enseñansa of gremio di scol, pero tambe cu e organisacion di mayor pa atende cu nan algun puntonan di atencion. Crisis team ta bin realisando esaki cu tur directiva di scol riba dialuna

Sra. Glenda Hernandez, a bisa cu un punto cu a wordo trece dilanti durante e deliberacion pa cambia e fecha di apertura di scol y cer’e pa dos siman, tin di haci cu e consecuencia pa examen escolar cu ta bin den luna di october. Hernandez a bisa cu esaki lo haya su debido atencion.

 

Crisis team a yega na e decision aki pa asina frena e mobilidad y sigur bahada di casonan di Covid. Nan ta haya cu e cambio di apertura escolar lo por contribui cu esaki. Tur scol, sin excepcion, lo keda cera pa un periodo adicional di dos siman te dia 3 di september. Nan lo monitor ki efecto e decision aki ta bay tin riba e subida di casonan di Covid. Pero nan ta spera cu lo tin un bahada di e casonan di Covid.

Pa loke ta trata crèche y Traimerdia, crisis team a propone pa nan keda habri, pero cu un 50% di nan capacidad, manera nan tin aworaki habri, y por lo pronto e lo keda asina. Nan intencion tabata pa nan cera tambe. Pero un decision asina no lo por, pasobra e lo por tranca e mercado laboral.