E problematica di cacho cu pushi riba caya ta uno cu ta keda crece cada aña cu pasa. A pesar di e trabao duro di diferente fundacion y organisacion cu ta dedica na yuda e bestianan cu ta riba caya, e cantidad di animalnan cu mester ayudo ta surpasa e cantidad di espacio y ayudo cu e organisacionnan por ofrece.
Durante e tratamento di presupuesto 2024 Minister Ursell Arends a trece pa dilanti e tema di dierenwelzijn (bienestar di bestia).
El a remarca cu e problematica di pushi cu cacho riba caya ta un problematica cu mayoria, si no tur, persona den comunidad por tuma nota di dje. Y un problematica cu ta afecta algun persona tambe. E mandatario a splica cu aworaki tin un destaho publico ta andando y den resupuesto 2023 a aproba un suma di 1.6 miyon florin di inversion disponible pa construi un Animal Control Department.
El a sigui splica cu tin e Centro di Control di Cacho cu ta bon pa establece total di ocho cacho y cuater pushi. E Animal Control Department nobo cu Gobierno di Aruba ta bay traha y cu, segun Minister Arends ta indica mester ta cla pa fin di aña 2024, ta bay ta grandi suficiente pa ubica un total di 80 cacho y 40 pushi, fuera di esey otro tipo di animalnan tambe
