Dr. Wilmer Salazar di departamento di Salubridad Publico (DVG) ta sigura cu tin un maneho specifico cu ta wordo ehecuta pa e parti di desperdicio cu tin di haci cu e pashentnan di Covid-19.
Mirando e situacion actual di Covid-19, caminda hopi hende a resulta positivo, y naturalmente nan a wordo poni den isolacion den nan cas of den hospital, a traha un plan riba maneho di control di desperdicio pa nan. Dr. Salazar a bisa cu e plan aki a drenta na vigor na luna di maart ultimo ora cu Covid a presenta oficialmente na Aruba.
E pashent di Covid y nan famia ta wordo informa con nan mester deal cu tur e materialnan di desperdicio pa evita mas contaminacion. No solamente nan mes, sino e hendenan cu ta piki e sushi.
E ta inclui con nan ta colecta y pone e material produci pa e persona cu Covid. Tambe con nan mester desinfecta e sitio. El a bisa cu cada bes cu personal di salud ta bishita un pashent cu Covid, nan ta splik’e con nan mester atende cu e parti aki.
Pa transporta e sushi aki tin un transporte special encarga cu e trabao aki. E desecho aki no ta bay den e mesun desperdicio domestico. “E ta apart totalmente cu un truck special”. Ademas el a laga sa cu e personal cu ta piki e sushi aki ta bisti di un forma cu ta proteha su mes. Tambe nan mester evita cu lo por cay sushi afo.
E ta haya cu tur sector, y comunidad en general, tambe mester duna nan contribucion. Si tin hende cu problema respiratorio sospechoso, bo mester por sa con bo por pone tur bo desperdicionan di forma safe.
