Pa Eman campaña no ta caba nunca?

Tres dia despues di eleccion, y cu e anuncio cu e ta retira como lider di partido, tabata parce ayera cu campaña no a caba mas pa Mike Eman. El a haci un yamado riba su simpatisantenan pa na presenta pa acompaña su persona den e par di cien metro cu ta separa su oficina di esun di Gobernador. Ta ken e kier a impresiona? Su mes hendenan lo ta, pasobra su contrincantenan sa cu no ta relevante cuanto hende e pone dilanti oficina di Gobernador, mas importante ta kico e ta bay bisa den e oficina mes.

Di loke nos por a comprende di su expresionnan riba diadomingo, tabata zona manera un cierto lamento cu diasabra marduga, aparentemente sin consulta cu su hendenan, el a dicidi cu e ta retira como lider, y alavez a bisa cu su partido ta opta pa oposicion. Durante e dia siguiente tabatin un ambiente di aparente recapacitacion, eventualmente bao presion di su fanaticonan, pa busca un forma di sigui. Esey tabata e tono di e yamado na e fanaticonan pa bin compañ’e den su biahe cortico te na Gobernador. Si tabata pensa cu e multitud mester a haci un diferencia, anto e mester a trece un poco mas masa cune. Pero en todo caso ta keda e pregunta ta pakico nan a bin, si tur otro lider politico a bin y bay nan so, manera mester ta. Awor, nos a siña conoce Mike Eman como un persona cu ta haci e cosnan diferente, y tanten e no ta toca interes di otro, esey ta bon.

Lastima pa su hendenan cu, si nan a kere cu el a bay Gobernador pa bis’e bon cla kico ta kico, anto nan a sali decepciona. El a sali for di despacho di Gobernador y a ripiti loke el a bisa diasabra marduga… ni  mas, ni menos: cu obviamente e otro partidonan no kier traha cu AVP, y den e circunstancianan ey no tin tanto sentido pa sigui pusha. Por ta cu henter e show di ayera no tabata nada mas cu un ‘doekje voor het bloeden’ pa su hendenan, cu ainda ta den shock cu el a opta pa bandona politica activo. Un ultimo oportunidad pa ta cerca di e lider. Ademas, e solo por a sinti menos cayente ora bo ta acompaña… Of el a cuminsa haya falta di su entourage caba? Por ta, pasobra por lo pronto e ta bay den historia como  e ministro presidente mas caro pa su corte real cu el a mantene, di mas di 100 persona, pa nos haya paga. Den ocho aña, e termino patronahe politico no a yega na su mente, mescos cu transparencia, integridad, bon gobernacion, y un par mas. Pa su persona, berde y  desaroyo sostenible tabata suficiente, pa usa den discurso, no pa practica di berdad. Djis analisa un rato: den ocho aña no tabatin nada di legislacion ambiental, e dumpnan a keda pio, despues cu duna un compania amigo e beneficio di duda pa yuda resolve. Nos tur sa unda nos ta para awe.

Anto nos mester tende lamento cu bo contrincantenan politico ta critica bo, y ta bisa cu bo no a haci nada pa para corupcion den bo partido y bo gobierno; nan a gaña? Tur loke ta pasando awor, cu un ministro cera y mas pa bay, ta invento di bo contrincantenan politico? Si esey ta berdad, y nan tin tanto influencia riba ministerio publico, anto nos ta lamenta cu nos no a pone nan tuma e accion aki hopi tempo pasa caba!

Pero laga nos pone observacion amarga di esun cu a gana, pero toch a perde, un banda.  Mas importante ta cu, di loke nos a tende di otro partidonan, ta bay tin negociacion entre MEP y POR en todo caso, y esey ta e paso logico cu tur hende a anticipa. Tin hopi cos di papia, pa cuminsa algo cu varios persona ta señala caba: e problema financiero. Por cierto nos a tende lider di POR menciona ayera un suma entre 200 y 300 miyon florin di deficit presupuestario pa e aña aki. Den e editorial aki nos a yega na un calculacion hopi conservador di e deficit di 100 pa 150 miyon florin, y nos ta spera cu nos tin razon y no su persona, no pa simplemente tin rason pero pa nos mes bon… En todo caso e director di Finanzas tambe a acudi cerca Gobernador pa pone su persona na altura di  e situacion financiero berdadero. Na su debido tempo nos ta haya tende con malo cos ta. Consecuencia ta cu, manera bisa mas biaha, espacio financiero pa haci cos bon y necesario lo ta sumamente limita.

Apesar di e comentarionan di varios cu e coalicion aki no tin mucho perspectiva, esey no ta necesariamente berdad. Por ta cu ta hustamente e realisacion cu no tin placa pa gasta na cos inutil o innecesario por haci cu lo tin mas seriedad den e responsabilidad comparti. Laga nos observa loke ta bay sucede den negociacion di formacion cu serenidad. Esey ta loke nos mester despues di e campaña electoral agita aki.