‘Ban lesa, biaha y gosa’, ta e tema di e 27 Festival di Buki pa Mucha, asina directora di Biblioteca Nacional Aruba (BNA), Astrid Britten a declara na Bon Dia Aruba. E apertura di e festival a tuma luga oficialmente na Cas di Cultura diabierna ultimo, y a conta cu presencia di Minister Presidente, Evelyn Wever-Croes, Minister di Enseñansa, Rudy Lampe y Parlamentario Shaliny Tromp-Lee.
Britten tabata masha emociona: “Bo tin canto, baile, buki y actuacion. Nos tin tur cos pa ofrece durante e di 27 apertura di nos Festival di Buki pa Mucha.” Tabatin un mercado di buki pa mucha cu participacion di varios libreria.
Aunke pronto e festival aki lo celebra 30 aña di existencia, semper el a keda cu un curason di mucha. “Ta p’esey nos ta haci’e, pasobra nos tambe tabata mucha”, el a declara na e matutino aki. Tur esaki ta wordo haci pa pasion pa lesamento, ya cu un cos basico cu e mucha mester keda domina -segun directora di NBA- ta e habito di lesamento. Sea cu bo ta lesa di un forma digital of den forma fisico, bo mester domina e habito di lesamento.
El a bisa cu BNA a prepara full un programa conhuntamente cu su ekipo, entre nan cu e docentenan y muchanan di Scol Pio X di Dakota, cu a keda encarga cu e contenido. Igualmente nan a presenta un cancion. E cantica di Festival di Buki pa Mucha a keda zona pa tur mucha gosa di dje, cant’e y bail’e. Esaki ta ‘Ban keiro’, un cantica den ritmo di tumba. E cantica ta un produccion di compositor Zulaika Geerman, areglo di Sergio Tjie A Loi. Cantante ta: Kitai de Jongh. “Nos ta sumamente cu esaki,”el a bisa.
Tambe directora di BNA a haya como un grato sorpresa di parti di Robert Reeberg. Den pasado Robert Reeberg a yuda biblioteca hopi biaha cu actividad pa mucha y tambe a participa como autor na e Festival di Buki pa Mucha. Na diferente ocasion, Reeberg a compone y produci e canticanan di e festival. Despues di a lansa e cantica ‘Sigui lesa bay,’ Reeberg a dicidi di laga produci un videoclip di esaki. E videoclip aki a keda strena den e apertura di e festival aki. Tambe e grupo Pierewietje tambe a deleita e publico presente cu nan canto y baile.
Den Festival di Buki pa Mucha 2019 e tema central ta ‘Medio di transporte’ (Vervoersmiddelen). E aña aki Richard Dabian a skirbi un storia pa e muchanan di Aruba. E buki su titulo ta ‘E Faro di Multicolo’ y esaki a keda ilustra pa Géwout Esselink cu a bira e buki di e festival.
E biaha aki e festival ta conta cu e presencia di 14 autor cu ta participa y tambe nan tin un cantidad di 64 scol basico, preparatorio y special cu ta participante. E festival ta dura un siman largo, for di awe te cu diabierna e diferente autor di buki y ilustrado ta bishita scol pa stimula mucha pa lesa. Scol, libreria y otro instancia tambe ta parti di e festival. Atardi 3or dialuna pa diahuebs (dia 4 pa dia 8 november) tin actividad na biblioteca di Playa y San Nicolas pa tur mucha.
