E momento cada bes mas crucial pa e siguiente proceso di fiansa for di Hulanda pa pais Aruba por atende cu su gastonan operacional ta cerca. Dia 3 di juli Hulanda kier mira nos plan di reforma riba diferente area den forma structural.
Prome Minister, Evelyn Wever-Croes a declara na Bon Dia Aruba cu pa cumpli cu e condicion aki, gobierno a institui un comision di recuperacion economico y innovacion cu tin full un structura interno cu ta inclui alrededor di shen persona. E comision di maneho mes ta consisti di personanan di e sector semi-publico y priva y no di sector publico so.
Aworaki nan ta trahando riba elaboracion di e plan concreto riba con e reformanan lo wordo ehecuta. Actualmente nan ta trahando riba dje pa entrega na Hulanda prome cu 3 di juli.
Te ainda Aruba ta bayendo bon pa cumpli cu e condicionnan cu a wordo poni te cu awor. El a bisa cu e condicionnan ‘no ta facil y nan ta hopi duro pa cumpli cu nan’. Pero e tin full confiansa cu e biaha aki tambe pais Aruba lo por cumpli cu e condicionnan dia 3 di juli awor.
Pero e no sa kico lo bin despues di e fecha ey. Gobierno di Aruba a yega di lamenta y cuestiona cu cada den conseho minister di Reino ta bin dilanti mas condicionnan. El a bisa cu e deseo lo ta pa 3 di juli cu nan ta entrega nan peticion den conseho di minister di Reino, e lo ta pa tres luna. Esaki lo trece un poco di mas trankilidad. E no ta descarta cu por ta na luna di september, pais Aruba ta miho para financieramente y cuminsa genera nos entrada, no mester haci e fiansa cerca Hulanda di e forma cu ta tumando luga, sino di otro forma.
E ultimo biaha, Hulanda a pidi gobierno di Aruba pa corta cu 5 miyon mensual for di gastonan di AZV. E biaha ey gobierno mester a dicidi inmediatamente pa logra e fiansa di 113 miyon pa cumpli cu salario di ambtenaar, FASE y percura cu tin subsidio di salario. Pero fundamentalmente pa dispone di placa pa por cumpli cu tur gasto cu pais Aruba tin.
