Ayera mainta despues cu votamento pa presidente nobo di parlamento a tuma luga, cual a duna como resultado cu parlamentario Raymond Kamperveen di fraccion RAIZ ta bira e presidente nobo di parlamento, prome minister y ministernan di MEP a entrega carta oficial di retiro di gobierno cerca Gobernador di Aruba.

Manera ta conoci, pa algun dia caba tabatin tension pa loke ta e votamento pa presidente y vice presidente di Parlamento di Aruba. Fraccion RAIZ a informa partido MEP cu anticipacion cu nan no lo sostene Edgard Vrolijk pa bira presidente di parlamento pa un otro termino, pero a indica cu nan tabata dispuesto pa sostene cualkier otro miembro di fraccion MEP pa bira presidente di parlamento.

Poco prome cu e reunion publico mester a cuminsa, carta oficial di MEP a indica cu sr. Vrolijk ta keda nan candidato pa presidente di parlamento y no ta bay nomina ningun otro persona. Como resultado di esaki, RAIZ a sostene parlamentario Kamperveen, ken a ricibi 11 voto na fabor, sumando e votonan di partidonan di oposicion.

Pa e motibo aki prome minister, Wever-Croes y su ministernan a tuma decision di entrega retiro di Gabinete Wever-Croes II. Aworaki Gobierno di Aruba ta bira un gobierno demisionario y eleccion pa scoge gobierno nobo ta programa pa tuma luga dia 6 di december 2024.

Despues cu prome minister y ministernan di MEP a entrega nan carta oficial di retiro di gobierno cerca su excelencia Gobernador di Aruba, e mandatario a duna declaracion na prensa den cual el a indica cu e decision cu nan a tuma pa entrega e carta di retiro di gobierno nan a tum’e a base di decision di nan partner den coalicion, RAIZ, cu segun prome minister a busca aliansa cu oposicion y kibra asina e acuerdo entre MEP cu RAIZ.

A puntra prome minister si den e caso di candidato pa presidente di parlamento, si otro candidato of otro nomber di partido MEP cu no tabata Edgard Vrolijk no tabata un opcion y asina tal vez por a evita cu e situacion lo a desenvolve di e manera cu el a sucede.

Wever-Croes a splica cu pa partido MEP nan candidato tabata Edgard Vrolijk y esey ta algo cu nan a informa na fraccion RAIZ. El a sigui splica cu Sr. Vrolijk a haci hopi cos pa parlamento, e ta e parlamentario cu mas hopi ley, sobretodo riba e tereno di integridad y nan no a wak ningun motibo pakico nan mester a nomina otro persona na su luga pa bira presidente di parlamento.

“Riba su mes nos no tin niun motibo pa cambi’e. Si bo kier mi cambi’e bo tin cu duna mi motibonan cu mi ta compronde bo anto sigur mi ta dispuesto. Ayera despues cu mi a papia cu lider di RAIZ y mi a primintie cu mi ta bay toch un partijraad mas atrobe cu e poco informacion, y partijraad a bisa nan ta sostene candidatura di Edgard Vrolijk,” el a indica.

Despues cu e resultado pa presidente y vice presidente di parlamento a bira conoci, lider di fraccion RAIZ, parlamentario Misha Raymnond y presidente nobo di parlamento Raymond Kamperveen a duna declaracion na prensa.

Den su declaracion, parlamentario Raymond a indica cu no ta un secreto cu tin hopi critica tocante con ta usa e funcion di presidente di parlamento cual su trabou primordial ta maneha con democracia ta reina den sala di parlamento.

Manera ta conoci tabatin diferente desaroyo cu a tuma luga e aña aki, incluyendo e ley di matrimonio igualitario, cual segun e lider di fraccion RAIZ a indica tabata un di e motibonan principal pakico nan no a sostene e ex presidente di parlamento.

El a splica cu e motibo pakico RAIZ a tuma decision pa no sostene Edgard Vrolijk mas tin di haber cu e momento cu e votamento di matrimonio igualitario mester a tuma luga caminda presidente di parlamento kier a cambia e sistema di vota pa ley y no a duna tur informacion y asina a bay contra constitucion y reglement van orde.

Parlamentario Raymond a sigui splica cu un supervision mas halto a bisa e presidente cu e no por haci esaki y toch el a hacie. Como lider di fraccion el a informa e presidente e momento ey cu RAIZ no ta bay participa ni sostene e tipo di practicanan aki y esey taloke finalmente a hiba nan na tuma e decision pa no sostene Sr. Vrolijk. “Esey ta loke a hiba nos fraccion na bisa nos no por sigui sostene e tipo di maluso di poder pa beneficia e fraccion di MEP,” el a remarca.

Na mesun momento parlamentario Raymond a enfatisa cu no tabata nan intencion pa pusha parlamentario Kamperveen bira presidente di parlamento, pero nan a pidi MEP si por duna otro nomber di nan fraccion cu nan por sostene, pero na final MEP no a cambia nan candidato.

“Mi ta haya lamentabel cu nan ta bisa cu emocion a hiba fraccion RAIZ pa tuma e decision aki. Mi ta haya lamentabel cu ta bisa cu ta persecucion politico of cu nos ta tuma represalia pa un votacion,” el a remarca.

El a splica cu e acuerdo di gobernacion ta bisa en berdad cu MEP tin presidencia di parlamento, y RAIZ di su banda a bisa nan ta bay sostene un presidente di parlamento di MEP, mientras cu e no ta Sr. Vrolijk.

“Bo no por pidi di nos fraccion pa sostene un hende cu a mustra cu e ta bay asina leu cu e ta bay contra constitucion y reglement van orde pa sirbi interes di su partido, esey nos no ta bay participa na dje,” el a enfatisa.

Parlamentario Raymond a indica cu Sr. Vrolijk tabata sa cu RAIZ no ta sostene su practica ya cu e tabata hiba su presidencia den beneficio di partido di MEP y e prome punto di un presidente ta imparcialidad. “Bo mester keda neutral pasobra bo tin cu dirigi diferente fraccion den parlamento,” el a señala.