Pa desacuerdo riba representante, AVP no a participa den debate politico di Camara di Comercio

E decision di partido AVP pa pone candidato Wendrick Cicilia como number uno riba lista mientras cu a pone lider di e partido Mike Eman na number 29 ta keda un punto di confusion y polemica durante campaña. E biaha aki, hasta a bira motibo pakico e partido berde no a participa den e debate politico di Camara di Comercio.

E debate politico organisa pa Camara di Comercio (KvK) durante campaña electoral a bira casi un tradicion, ya cu ta organisa esaki pa hopi aña. Custumber di e gremio comercial ta pa lidernan di cada partido participa representando nan partido.

Sinembargo, e aña aki, a surgi un desacuerdo na momento cu partido AVP a scoge pa manda nan candidato number uno riba lista, Wendrick Cicilia como nan representante den e debate, pero KvK no a acepta esaki pa motibo cu regla di e debate ta indica cu ta lider di e partido mester ta presenta.

Presidente di KvK, Diederik Kemmerling a papia cu portal online NoticiaCla ayera mainta, bisando cu e gremio comercial ta lamenta e decision di AVP pa no participa den e debate, pero cu “tin regla y mester tene bo mes na dje.”

Kemmerling ademas a informa cu tin tres tanda den e debate, den cual e prome y di tres tanda ta rekeri pa e lider di partido ta presente. Sinembargo, den e di dos tanda ta posible pa Cicilia ta e representante, ya cu den e tanda aki, cada partido por presenta otro candidato cu no ta e lider, asina haciendo regla igual pa tur. Segun KvK, nan a considera esaki como un manera pa ambos banda yega na otro, ya cu KvK ta permiti AVP pa profila Cicilia, mientras cu AVP ta cumpli cu e reglanan di e debate di KvK.

Sinembargo, despues KvK a expresa sorpresa na momento cu a traves di prensa a bin dilanti cu partido AVP a dicidi di no participa mas den e debate. Segun Kemmerling, e gremio comercial “ta lamenta esaki y ta considera esaki un oportunidad perdi pa e partido. Nan a keda invita pa ta presente, pero cu e lider,” el a bisa na NoticiaCla.

Mientras tanto, tur otro partido si ta participa cu nan candidatonan pa responde pregunta di KvK, prensa y preguntanan entrega online pa ciudadanonan di Aruba mes.