ORANJESTAD – Minister Rudy Lampe a laga sa cu for di Hulanda a yega caba e prome container cu un cantidad di buki di segunda mano y bankinan cu lo wordo uza den scol basico, debi na e demanda grandi di mucha cu ta biniendo.
E mandatario a aclaria cu e materialnan aki ta den ‘hopi bon estado’. Parti di e material cu nan a ricibi for di Hulanda ta destina pa e klasnan nobo cu nan ta premira cu mester bay habri pa por acopla e cantidad extra di muchanan cu nan ta premira cu lo bay haya na augustus awor.
E mandatario a laga sa cu un di e decisionnan tin di haber cu si e mucha ta haci 4 aña te cu dia 31 di december, e por wordo inscribi y cuminsa na augustus caba pa drenta scol preparatorio. E decision cu nan a tuma tin su impacto, pero esaki ta un manera pa cumpli cu e ley di enseñansa obligatorio cu esun di 4 aña mester haya educacion te cu 16 aña.
A base di dialogo cu cabesantenan di scol minister a yega na e decision aki. Kiermen aunke e mucha por tin 3 aña prome cu e ta cuminsa kleuterschool e mag di wordo inscribi pa drenta nos sistema di enseñansa. Esaki ta bay nifica un aumento di muchanan cu ta bay pidi pa drenta scol preparatorio.
Nan lo sigui hayando container pa atende cu e situacion aki. Nan lo sigui cu e proyecto di ricibi e apoyo aki di parti di Hulanda. E mandatario ta haya cu mirando e limitacion financiero cu pais Aruba tin, e apoyo aki ta ‘hopi bon bini’.
Lampe lo sigura pa e materialnan aki yega na e diferente scol. “Sigur esaki ta un bon noticia pa tur esunnan cu ta traha den enseñansa, pero pa henter comunidad,” el a bisa.
