Pa cualkier keho di transporte publico por acerca DTP

Recientemente a tende keho di comunidad, caminda persona ta tuma transporte publico di DOPV (Dienst Openbaar Personen Vervoer) y a ripara varios actitud y uzo di substancia di parti di e chauffeurnan.

Segun e keho cu a ricibi a menciona cu tabata involucra keho di dos bus (36 y 113), cu tabata core den un manera iresponsabel y bou di substancia ‘alcohol of droga’. Tambe e persona a bisa cu e chauffeur tabata core ‘desorienta’ y hera perde control, cu por ocasiona accident.

A acerca Theo Kock di departamento DTP, pa splica situacion tocante chauffeurnan cu ta core iresponsabel riba caminda publico y cu pasahero den bus. Locual el a menciona ta cu DTP (Departamento Transporte Publico) ta autorisa pa haci cierto control riba e ‘vergunninghouders’, esunnan cu tin e permiso pa core.

Test di alcohol y droga riba caminda no ta parti di esaki, sinembargo si por haci steekproef, y tambe ora tin sospecha, manda un vergunninghouder bay haci dentro di 24 ora un test di orina pa wak si e por tin un kimico cu no ta permitibel den su sistema. Blaastest of cualkier otro test tin cu hacie via polis.

Den caso cu e persona tabata core iresponsabel y haya testimonio di e pasaheronan, DTP por conhuntamente cu polis haci control, aunke ‘esaki ta a base di cooperacion y no obligacion’. Kock ta splica cu por actua riba ‘Landveroderdening personenvervoer’.

Sinembargo e ta bisa cu DTP no tin suficiente hende pa ta tur caminda, pues ta basa riba tip cu ta haya pa asina por actua den e caso cu haya un chauffeur ta core di manera iresponsabel. “Hopi hende, na momento cu mester testigua, no ta bin haci esaki na DTP pa por tin zwart op wit”, e ta splica.

Si esey sucede, nan mes lo hala atencion di e chauffeur cu tin permiso y nan por scucha di su banda pa mira si tin cosnan concreto cu ta demostra cu e tabata faya cu su vergunning. Esey ta duna mas motibo pa entro otro haya waarschuwing y notificacion di consecuencia di sigui actua di e manera ey.

Kock a menciona cu tin un tiplijn y tambe na info@dtp.aw pa por manda un potret, video y testimonio di cosnan cu por pasa pa esunnan cu tin e vergunninghouder por faya riba dje.