Pa conmemora dia internacional di garoti blanco strepi cora; FAVI a tene actividad cu diferente personalidad y personanan cu limitacion visual dilanti parlamento

Ayera mainta tabata un dia hopi alegre pa personanan cu limitacion visual, esaki tabata enfoca riba conscientisacion na unda cu Fundacion Arubano di esnan Visualmente Incapacita (FAVI) a tene un actividad dilanti Parlamento di Aruba pa conmemora e Dia Internacional di garoti blanco strepi cora.

Den actividad aki por a mira diferente parlamentario cu e ocasion aki a uni pa asina experiencia pa un par di minuut kico e personanan cu limitacion visual ta biba y ta sinti ora nan ta riba caya.

Cetty Baarh, director di e fundacion a splica na Bon Dia Aruba cu 15 di october ta Dia Internacional di garoti blanco di strepi cora cu ta un simbolo di e persona cu tin un limitacion, e persona ta usa e garoti aki pa e por mobilisa na e momento cu su bista a bay completamente.

“Pero e tambe ta un simbolo cu e persona ta independiente, cu e por cana su so, cu e por haci su cosnan riba su mes” el a menciona.

Ta p’esey cu dia di ayera nan a pone enfasis riba e uso di e garoti no solamente den trafico pero tambe den e bida diario di un persona cu tin un limitacion di bista, “awe nos a bin dilanti di parlamento y nos a haci un invitacion tambe na parlamentarionan pa nan por experiencia kico e ta pa ora tin un limitacion di bista”, Baarh a indica.

Asina mes, el a bisa cu pa FAVI ta importante pa yuda personanan cu tin un otro limitacion, como bista abou pero tambe personanan cu ta completamente ciego, no ta solamente e persona cu ta completamente ciego ta usa e garoti sino tambe e persona cu no ta mira bon mas “pa nos ta importante cu e comunidad sa cu tin personanan cu ta haci uso di dje y cu tin personanan cu mester e support di nos comunidad pa mobilisa” el a bisa.

Si personanan ta sali riba caminda cu un auto y mira un hende cu un garoti blanco, dun’e un pitra y lag’e sa cu el a wordo mira pa e persona aki por crusa e caminda, tambe si ta mira e persona den un tienda of cualkier otro caminda hala un tiki na banda y haci e caminda liber pa e persona por crusa, esey ta algo di comunidad completo pa pone atencion na e persona cu limitacion y e persona aki ta mobilisa su mes cu su garoti.

Liliana Rasjmin di Cuerpo Policial di Aruba ta un di e personanan cu tabata presente na actividad aki y a bisa pa Bon Dia Aruba cu e experiencia cu garoti blanco y su wowonan tapa y dunel’e un experiencia “hopi raro y un sentimento hopi mixto” pa motibo cu el a sinti hopi insigur door cu bo tin bista y di repente nan a tap’e na unda cu el a wak e claridad pero e no a wak e obheto.

“Bo no sa con bo ta stap, echt bo mester usa e garoti blanco cu strepi cora pa bo cuminsa sinti con bo ta para, na unda bo ta bay baha, pero lamentablemente si bo a ripara e automobilistanan ora mi mes usando e uniforme di polis y usando e garoti blanco crusando e caminda nan mes no a para, si nos cu tin uniforme di polis y ta haciendo un demostracion pa e pueblo y pa nos sostene loke ta e echo awe di FAVI, mi ta puntra mi mes con e personanan mes cu tin bista limita con e trafico ta trata nan?”

Pa e motibo aki, el a sigura cu e ta compronde con pa hopi biaha e personanan aki no ta forma parti di e trafico pasobra e comunidad y automobilistanan mester wordo educa pa ora nan wak e garoti blanco strepi cora e lo wordo lanta, e persona ta bay crusa y e automobilista mester pitra pa e sa cu e por crusa sigur.

Ademas, el a declara cu nan kier keda conscientisa henter e aña pa pueblo haya sa e balor di e personanan aki cu ta usa nan garoti.

Mervin Watt Ras parlamentario di AVP a expresa cu e experiencia pe tabata formidabel, pa motibo cu “ora bo ta cana blinda banda di e persona e ta diferente cu bo mes ta blinda y bo no ta wak nada, e ora ey bo ta dependiente di otronan, di stemnan, zonidonan di auto y bo otro sentidonan ta traha, mi a haya hopi respet inmenso pa esunnan cu tin un deficiencia den bista y mi a weita cu nan ta contento cu nan ta anda cune, nan ta siña biba cune y nan ta haya otro formanan pa wak bida y pa ta den bida, den esey mi a haya un respet inmensamente grandi pa nan” Watt Ras a declara.

Di su parti, Shailiny Tromp-Lee parlamentario di AVP a trece dilanti cu pa su persona esaki tabata un experiencia unico “cu ta pone bo para keto un rato y realisa na e grado di limitacion di e hendenan aki cu ta biba cune, sigur nos tin un tarea pa sigui conscientisa ora mi a mira e actitud di e automobilistanan cu ta rekeri di nos pa yuda nan pa nan por participa den bida diario, cu un simpel crusamento di caya nan ta depende di nos pa yuda nan riba diferente tereno”, el a finalisa.