Pa conmemora Dia Internacional di Derechonan di Mucha: Thousand Smiles Foundation organisando actividad pa mil mucha

Diahuebs ultimo, Thousand Smiles Foundation a haci un conferencia di prensa unda nan a introduci nan mes como un fundacion nobo cu tin e obhetivo di yuda comunidad cu diferente proyecto.

Amarilles Calle vice-presidente di e fundacion aki a anuncia cu e meta cu nan tin ta pa yuda tur ciudadano na Aruba “nos ta un fundacion cu ya caba ta haciendo obranan caritativo, obranan pa sociedad, pa mucha, pa pareha, pa mamanan soltero, tur e problemanan social y emocional cu tin na Aruba nos t’ey pa brinda ayudo”, Calle a anuncia.

Asina mes, el a bisa cu nan tin como vision yuda e ciudadano “di hende pa hende”, nan ta bezig cu hopi proyecto, como evenementonan cu ta yuda e ser humano pa por biba un bida di calidad.

E biaha aki nan ta trece dilanti un proyecto unda nan kier haci e muchanan feliz, “e muchanan cu ta e futuro di mañan, esunnan cu tin menos recurso, esunnan cu pa hopi biaha keda atras of ta wordo neglisha, na tur e muchanan aki nos kier duna un smile”, el a sigura.

Ta p’esey cu nan kier invita comunidad pa forma parti di nan fundacion Thousand Smiles cu ta bay tin un actividad dia 20 di november, pa esaki, Ruthdlene Flemming P.R di e fundacion a splica cu diahuebs ultimo nan a haci e fundacion oficial pero ya caba nan a realisa diferente tayer y proyecto, e biaha aki nan ta informa di nan prome evento di e fundacion pa muchanan.

Nan ta enfoca riba muchanan cu menos recurso y muchanan cu ta cay bao capa special cu “pa hopi biaha ora nos ta papia di futuro, nan ta wordo eigenlijk exclui, e evento aki ta pa dia 20 di november cu ta Dia Internacional di Derecho di Mucha”, Flemming a comenta.

Esaki lo tuma luga na Bochincha for di 4or di atardi te cu 8or di anochi unda lo tin diferente weganan, snacks, cotton candy, face painting, dino jump, show di diferente gruponan, entre otro, cu na final di e dia e muchanan lo ricibi un tas cu un regalo. Nan a informa cu personanan interesa por tuma contacto na e number di telefon: 594.3485 pa asina haya mas detaye di e actividad aki of pa sponsor.

Pa e dia aki, nan kier uni e cantidad di 1.000 mucha cu ta bay wordo registra door di diferente fundacionnan cu ya caba a wordo invita, “nos ta bay duna carchi, unda e muchanan ta bay ta VIP di e dia aki, pa 4 ora nan ta bay pasa pret, sin paga nada, solamente nan tin cu registra, si a bo conoce un mucha cu normalmente su mayornan of famia no ta sali, bo por registr’e pa e cay den e mil muchanan aki”, el a bisa.

Igualmente, el a menciona cu pa haci un evento di e magnitud aki no ta facil, vooral unda nan kier duna mas no ricibi, pa e motibo aki e ta invita pueblo di Aruba pa uni na esaki cu ta algo di comunidad pa comunidad, esaki ta un oportunidad na esunnan cu si kier uni na e proyecto por tuma contacto cu nan como compania pa haci donacion of como mayor pa registra nan yiu cu un costo di 25 florin pa mucha.

“Pa asina ey haci esaki realidad pa mil mucha, nos no ta bay baha e cantidad pasobra nan ta merece, ademas esaki tambe lo yuda nos cu otro proyectonan cu proximamente ta bay ta dirigi pa hobennan di Aruba”, Flemming a señala.

Comunidad Latino tambe ta wordo invita unda Colombianonan, Dominicanonan, Peruanonan, Venezolanonan, Chileno y otro nacionalidad cu ta haci bida na Aruba por acerca e dia aki pa comparti cu muchanan y celebra e Dia Mundial di Derecho di Mucha.

Pa e motibo aki, nan ta haci un yamada ta na tur compania cu lo kier uni nan mes na e causa aki y cu tin tempo ainda caminda nan tambe por adopta un mucha, contribui cu regalitonan of producto cu lo por bay den e tas pa e muchanan.

Pa por haci un contribucion na e fundacion aki, e number di cuenta ta: 24849109 di Banco CMB y den descripcion por pone Proyecto 1000 Smiles.

Pa finalisa, nan a indica cu aworaki nan ta bezig cu documentonan pa por oficialisa e fundacion, pero cu nan ta bin haciendo obranan di caridad for di aproximadamente di 7 aña pasa manera Calles a bisa, unda e aña aki comision a sinta y a dicidi di nombra y lansa e fundacion oficialmente.

“Aworaki nos tin claridad di kico nos kier, kico ta nos audiencia cu nos kier yega, y e fundacion ta bezig cune yama “1 Thousand Smiles” pa e por bira un realidad, nos ta mirando cu ta bay ta hopi grandi y ta bay haci un diferencia entre comunidad, mi ta kere cu e caminda cu nos por aporta na un sonrisa di un mucha, nos por aporta na un cas feliz y un comunidad feliz”, el a declara.