Den cuadro di Luna di Monumento, Stichting Monumentenfonds Aruba (SMFA) tin diferente actividad cu lo tuma luga entrante luna di september.
PR di e fundacion aki, Mircla Nava a anuncia cu entrante otro luna nan lo cuminsa cu e trabou di restauracion di e forno di calki den Rancho; y tambe cu e curso di tecnica di calki pa mantencion di edificionan monumental. Un tecnica cu a bay perdi y cu nos a antepasado tabata uza den nan trabou di construccion. Y pa clausura cu broche di oro e Luna di Monumento, nan lo organisa e di seis edicion di e Fiesta di Cunucu.
Dia 29 di september, pueblo di Aruba lo por bin celebra nos cultura y conoce Cas Tan Tin, cu ta e prome cas di cunucu cu a haya e cello di monumento protegi. E actividad lo ta na Pos Abou 19, unda ta situa e cas di cunucu aki di principio di siglo 20. Cas Tan Tin a wordo agrega recientemente na e coleccion di monumentonan di Stichting Monumentenfonds Aruba (SMFA).
E cas ainda tin su mueblenan original, por lo tanto publico por haya un impresion con famia Tromp, cu ta e doñonan original di e cas, tabata biba den e cas. Tambe fuera di esaki, Fundacion Museo Arubano lo pone obhetonan interesante cu semper e publico ta gusta wak y siña mas di nan, manera por ehempel e stilchi, e bidet y e telefonnan di antes y Roy Feliciana di Fundacion Museo Arubano lo ta presente tambe e dia aki, pa duna tur splicacion tocante di e obhetonan.
E aña aki SMFA tin partner nobo, cual ta Fundacion Mi Cutisa. Nan ta un fundacion cu e meta pa promove e cultura di Aruba y nan lo tin pañanan tipico pa un y tur, di grandi te chikito, pa asina e publico por bisti y saca potret rond di e cas. Tambe nan lo tin matanan local, artesania y mas na benta.
Pa locual ta trata e entrada di e bar, e aña aki tur e ganashi lo bay pa FEDAA, cu ta Fundacion pa Esnan cu Deficiencia Auditivo Aruba. Den cuadro di Siman di Lenguahe di Seña, cu ta cay den e ultimo siman di september, tambe a duna FEDAA e oportunidad aki, caminda pa medio di borchinan cu seña,e publico lo por haci pedido di nan co’i bebe na e miembronan di e fundacion cu lo ta trahando riba e dia aki.
Igualmente,Nava a sigui informa cu pa di seis aña nan ta sigui traha hunto cu Departamento di Cultura Aruba (DCA), cu un biaha mas tin un tremendo programa cultural bon varia pa entretene e publico presente cu musica y baile tipico di Aruba. Y por ultimo, e publico lo por tambe cumpra nan productonan local, cuminda crioyo, artesania y matanan local na e mercado cu lo tin e dia aki.
StichtingMonumentenfonds Aruba kier gradici tur e partnernan y patrocinadonan cu a uni e aña aki na e Fiesta di Cunucu, nan ta: Departamento di Cultura Aruba, Fundacion Museo Arubano, Fundacion Mi Cutisa, Fundacion pa Esnan cu DeficienciaAuditivo Aruba, Ministerio di Cultura, Aruba Bank, Balashi y CATC.
Un biaha mas PR di SMFA, Mircla Nava a formula un invitacion pa henter e pueblo di Aruba pa bin celebra hunto e clausura di Luna di Monumento, dia 29 di september na e grandioso Fiesta di Cunucu na Pos Abou 19 na Cas Tan Tin di 10’or di mainta te 3’or di atardi.
