Na cuminsamento di februari un incidente a tuma luga dilanti e costanan sur di Trinidad & Tobago na unda un barco a bolter lagando atras un cantidad grandi di oilspill den lama, pa dia 26 di februari Aruba a drenta den codigo oraño y pa 2 di maart a detecta teerballs den costanan di Aruba.
Esey ta nifica cu tur mainta nan bay wak y monitoria full costa di Aruba, na unda nan a parti Aruba den cinco pida. Nan a ruim op cu colaboracion di instancia y boluntarionan pa evita cu tur hende lo por haya fatiga y garantisa cu tur hende tabata bon pa identifica e oilspill.
Ayera redactor di Bon Dia Aruba a puntra na director di Crisis Management Office, Rino Hermans kico tabata e situacion actual na Aruba pa loke ta trata e incidente aki caminda el a sigura cu e situacion a stabilisa y ta normal na e momentonan aki, tambe a bisa cu ta bon pa hendenan keda atento ora ta cana rond y informa CMO, pa motibo cu nan tin un data bank cu den futuro cu Aruba lo haya un scenario igual nan por sa unda e teerballs a tuma luga.
Nan a pidi e funcionarionan encarga pa scout y tambe pueblo pa duna nan contribucion debi cu mas data nan ta recoge, miho nan por traha nan plan di responde cu menos costo y mas lihe nan por recupera e normalidad na Aruba.
“Esey ta e concepto cu nos ta bay pidi pueblo poco, poco pa duna mas informacion, pa asina nos por analisa y Aruba tin un data bank, cu cualkier incidente cu lo sosode tin informacion valioso pa por traha un plan,” Hermans a sigura.
Riba rednan social recientemente por a mira varios video di usuarionan den e costa di Aruba unda por a mira e presencia di teerballs di oilspill, di esaki Hermans a sigura cu Aruba ta bay sigui mira den proximo tres siman y nan no ta nifica un peliger, “pasobra en principio oilspill no mag di ta un crisis ambiental, e no mag di stroba e landando y tampoco mag di stroba e turtuganan di pone nan neishi na e beachnan, esey ta e plan di responde di Aruba cu nos ta aplica y door cu e teerballs ta minimo, nos tin DOW su grupo cu ta cana rond y ora ta posibel nan ta piki e teerballs manera nos a hacie fin di siman ultimo na ful e costa cu 15 hende cu a bay piki tur di nan,” el a sigura.
Hermans tambe a declara cu Aruba ta custuma cu e teerballs door di Jamaica y Trinidad & Tobago cu tin un ruta di barconan petrolero cu si nan ta pump over board, a pesar cu e ta prohibi, Aruba ta afecta pa teerballs.
Den 2016 Aruba tambe a experiencia efectonan di oilspill despues tabatin e incidente na Amuay, Venezuela, den cual a monitoria cinco biaha pero door cu esey no a afecta Aruba, esey no a bay viral, pero nan si ta haya informacion door di tratado di Caribe (Centro Regional de Emergencia, Informacion y Capacitacion pa loke ta trata Contaminacion Marina – Caribe Rac-Rempeitc Caribe) e cual ta coordina oilspill y nan ta notifica e instancianan concerni, den caso aki CMO.
“Nos tine cubri pero e incidente ta keda incidente y cualkier dia e por gara nos di sorpresa,” Hermans a finalisa.
