Director di Scol Ora Ubao, Ivan Croes:

Den un entrevista cu director di Scol Ora Ubao,  Ivan Croes, el a splica tocante algun punto importante pa nos enseñanza; for di ora nan cuminsa eerste klas y sigui bay te ora nan drenta un educacion secundario.

Croes ta aclaria cu enseñanza awendia no ta mucho bon pa motibo cu falta algun cos cu mester drecha. E ta remarca cu algun cos mester ta ‘in place,’ pero no ta. Segun Croes, si no tin base, e ta bira dificil pa por sigui traha a base di calidad.

Un di e puntonan cu Croes a remarca ta cu hopi biaha e maestronan ta bira creativo; ‘si no por haya cierto cos, ta bay na plan b’. Croes ta splica cu creatividad ta demostra cu e ta wordo logra y e juffrouwnan cu meneernan ta tene e calidad.

Sinembargo e director di e scol basico na Tanki Leendert ta aclara cu den algun caso ta e muchanan mes no tin smaak. Locual e ta referi na dje ta cu ta un reto diferente cu cada mucha. E ta duna ehempel cu tin biaha mayornan ta traha 2 – 3 trabou pa dia; “e mucha ta yega cas anto no tin hende pa wak p’e, si e ta haci huiswerk. Su unico solucion e momento ey ta bay cerca su amigo te laat ora mayornan yega bek, mucha ta baña, drumi y ningun hende ta enfoca riba su les.”

Falta di motivacion e cabesante ta remarca y e pregunta di e muchanan aki di pakico bin scol si nan no sa kico nan ta bay bira toch of pakico mester haci les. E ta continua cu directiva di scol cu mester bin cu cierto programa creativo.

Algun programa creativo cu lo bin segun Croes ta pa asina conscientisa, disciplina y pa yuda e muchanan traha riba nan comportacion, pa por domina y wak importancia pa nan mes haci escogencia. E ta splica cu e motibo ta pa asina e mucha por nota pakico ta importante pa siña, e por ta cu les ta laf, pero tin un meta pa cab’e.

Tambe ta indica cu tin dificultad pa locual ta parti di ‘taal’. E scol ta stimula e muchanan pa purba siña mas den klas y e maestronan ta purba haci algo otro na luga di bisa un palabra na Hulandes. “E maestro ta purba di mustra cu plaatjes, parachute. E ta pone kico ta relata na e palabra, pa asina e mucha wak’e mas profundo antes bo tabata siña palabra despues di 2 dia bo a lubida. Nos ta purba di traha cu conocemento, nos ta dun’e un veld di palabranan anto asina e ta yuda keda cu e palabra henter e siman.”

Croes ta splica cu mester laga e palabra cu e contexto fe di eerste klas caba pa asina nan cuminsa wak e diferencia. E ta agrega cu den eerste klas ta na unda e muchanan ta siña tur cos den ‘one shot’. E lesamento, skirbimento y su rekenen.

El a bolbe aclara cu e maestronan ta tuma nan tempo pa dedica na e parti di Hulandes. For di kleuter caba por cuminsa ‘fula tera’ cu e Hulandes y duna e mucha lesnan cortico pa asina ora e mucha drenta eerste klas, ta haci un ‘follow up’.

Ora e mucha yega tweede y e lesnan cuminsa bira poco mas dificil, e mucha tin e metodo di lenguahe activo. “Nos trabou ta pa tene e calidad di enseñanza den halto. Nos tin cu bira creativo. Y creatividad ta sali ora nos rondia kico ta relata cu locual nos ta siña haci e lesnan mas atractivo pa e muchanan.”

Finalmente, e director a señala cu maestronan ta haciendo e manera aki pa un tempo caba y cu ta adaptando na e sistema. E remarca si cu toch locual ta ‘taal y rekenen ta keda un problema,’ pero cu toch tin e cambio ey den enseñanza cu ta haci e lesnan mas creativo posibel pa duna mas interes na e muchanan y cualkier posibilidad pa yuda e muchanan.