Sharlene Koolman a referi na e maneho acorda cu Bonaire, unabes cu e isla flamingo a laga sa cu biaheronan di pais cu riesgo halto di Covid, no por bay Bonaire via Aruba.
Contestando pregunta di Bon Dia Aruba, e miembro di e crisis team a bisa cu considerando e decision di Bonaire, nos tin cu tene cuenta cu nan ta un isla cu nan capacidad ta hopi abao. Esaki ta haci cu naturalmente nan ta tene cuenta cu nan situacion, y protegiendo nan comunidad nan a bin cu algun condicion, locual ta na su luga. Bon Dia Aruba a bin ampliamente cu e informacion aki den su edicion di ayera.
Pa e motibo ey nan a restringi cu si un persona kier bay Bonaire, y el a yega Aruba prome procedente di Merca, cu ta un pais di riesgo halto actualmente. Si e persona aki tin menos cu 14 dia cu ta e periodo cu e virus por a manifesta su mes, na e momento ey, e persona no por bay Bonaire. Kiermen e mester pasa prome su cuarentena na Aruba.
Koolman a laga a sa cu esaki ta e unico restriccion cu nan a bin cune. Pero e decision di Bonaire tin su excepcion. E funcionario di DVG a splica cu si un local of persona residente di Aruba cu no a biaha niun parti, specialmente Merca, esey si ta wordo acepta pa bay Bonaire.
