Pa motibo di aumento alarmante di casonan di Covid-19 den ultimo dianan aki, Bon Dia Aruba a tuma contacto cu Tisa LaSorte, CEO di AHATA pa asina conoce su opinion tocante e ola number cinco den cual Aruba a drenta pa casonan di Covid-19.
LaSorte a splica cu e luna aki di December, hotelnan a cuminsa ricibi cancelacion pa motibo cu tin huesped cu miembro di famia ta test positivo na Merca. Despues a ricibi mas cancelacion na momento cu Aruba mester a cambia e rekisito pa drenta nos pais di Merca, pa test dentro di dos dia prome cu biahe. Ademas el a indica cu tin bishitante cu tin dificultad pa cumpli cu e rekisito y ta cancela, pero cu AHATA mes ta consciente cu e rekisito ta necesario pa Aruba.
Awor cu e cantidad di caso nobo cada dia na Aruba ta aumentando, nan ta anticipa cu pronto CDC na Merca lo pone Aruba riba lista di nivel 4 pa alerta di biahe, manera AHATA a expresa den nan relato di prensa dos siman pasa. Esey lo nifica cancelacion, specialmente di gruponan, na Januari y Februari.
Aki un siman AHATA lo publica datonan nobo, incluyendo proyeccion adapta despues di e situacion actual cu Aruba ta experenciando.
