Durante un conferencia di prensa di Gobierno di Aruba ayera den oranan di mainta, prome minister Evelyn Wever-Croes a trece dilanti un serie di medidanan nobo pa fin di aña debi na e aumento di casonan di Covid-19 na isla.

El indica cu esaki ta un di e momentonan dificil desde cu coronavirus a yega na Aruba na luna di maart ultimo. Pa motibo di aumento di casonan positivo, prome minister a bisa cu te ayera a registra 50 caso nobo y tin un total di 206 caso activo; e cifra di fayecido ta na 49.

El a menciona cu “nos tin motibonan pa preocupacion” y el a dividi esey den cinco categoria. Pa cuminsa e cantidad di casonan nobo pa dia ta aumentando, e averahe cu el a señala ta indica cu ta na mesun nivel cu tabata rond di e dia 19 di october, loke ta preocupante. Luna di december a habri cu un averahe di 18 caso pa dia, pa lo cual el a destaca cu nan a tuma cierto medidanan. Siman siguiente e cifra a baha te 12; tercer siman di december a ubica na 16 y awor den cuatro siman di december ta na 20 caso pa dia.

Di loke ta trata casonan nobo, prome minister a sigura cu ‘positivity rate’ – cu ta trata di porcentahe di cantidad di caso positivo den relacion cu e total di pruebanan haci den un dia – ayera tabata ubica na 31%, loke ta na mesun nivel cu augustus prome cu e peak na september, lo cual ta pone e situacion hopi preocupante tambe.

Di dos motibo, prome minister enfatisa cu ta e ‘testmento’. Nan a ripara cu hendenan no ta haci e prueba manera tabata haci antes, tin menos pruebanan cu ta wordo haci y e parti cu el a destaca cu ta mas preocupante p’e ta esun cu tin personanan cu ta warda te 5 dia cu sintomanan pa haci e prueba, lo cual ta trece como consecuencianan cu den dianan ey e persona ta plama e virus rond.

Di e personanan cu si ta haci e test, 80% ta haya e virus door di mesun miembronan di famia, 40% no sa na unda nan a hay’e. E hecho cu no por haya e fuente di contagio tambe ta un otro motibo di preocupacion, segun loke prome minister a afirma.

“Nos ta riparando cu nos hende local ta biahando mas y den varios ocasion nan ta bolbe back cu e virus”, el a sigura. Den un dia nan a registra 9 persona residente cu a bin di biahe di vakantie, 8 for di Merca y un for di Hulanda.

Otro motibo cu prome minister a trece dilanti, ta e comportacion di un grupo desde cu pandemia a cuminsa na maart. Nunca nan tabata tene nan mes na e reglanan, “cu tabata laga di desea e comportacion”. Pero nan a ripara cu e grupo aki a bira mas grandi, specialmente den ultimo fin di siman, caminda cu por a mira varios aglomeracion y fiestanan clandestino. “Nos ta mirando cu e fiestanan clandestino aki ta birando hopi popular.”

Di loke ta trata e musiconan y DJ, el a comenta cu nan a bira hopi creativo y cu nan actuacion y comportacion ta bin causando hopi aglomeracion, “lo cual hustamente nos a palabra cu nan cu no por pasa”, el a expresa.

Rond di mundo, dianan di fiesta a wordo considera como dianan di halto riesgo, pa motibo cu ta aumenta e plamamento di e virus. Y mirando cu e isla ta drentando den mesun situacion cu tabata na luna di augustus, esey por bira un menasa pa capacidad di cuido, ta bira un menasa pa salud publico y pa economia di nos pais.

Pa tur motibo aki, expertonan a conseha gobierno pa evita e situacion di lunanan pasa y implementa medidanan back cu ta drenta na vigor mañan 30 di december y lo ta valido te cu diadomingo 3 di januari 2021.

  • Pa comercio e orario di ciere ta bira pa 10or di anochi, cu excepcion di hotelnan.
  • Pa loke ta animacion musical, ningun fiesta cu musica live of DJ ta permiti.
  • Restaurantnan por tin animacion musical conforme cu protocolnan durante orario di operacion te 10or, bailamento no ta permiti.
  • Musico, restaurant y compliance officer ta responsabel pa cumpli cu reglanan.
  • Musica pafo di restaurant no ta permiti.

Di loke ta trata e tradicional pagara, esey por wordo tira te dia 31 di december te 3or di atardi.

Den mesun linea, a wordo introduci e medida di toque de queda desde 30 di december te dia 3 di januari for di 11or di anochi te cu 5or di mainta, cu excepcion dia 31 di december pa 1 di januari cu ta cuminsa 2or di marduga.

Aparte di esaki, prome minister a trece dilanti algun recomendacionnan cu ta wordo permiti na cas den oranan di bishita, cu esey si ta permiti pero “nos ta urgi bo pa limita e cantidad di persona cu bo ta ricibi na bo cas”, den caso aki ta permiti 10 hende paden di cas y 25 pafo, si esaki ta sali for di man Polis por actua.

Paranda Dande cu tambe ta forma parti di tradicion, no ta permiti pa e aña aki pa motibo cu ta un riesgo ora hende ta pasa di cas pa cas y por piki e virus y hib’e cune pa otro luganan.

Prome minister a dirigi pa doñonan di establecimento a bisa cu nan ta responsabel di e parti paden y pafo di establecimento, restaurantnan mester tene e cantidad maximo di 8 mesa paden y 10 mesa si ta den aire liber, clientenan mester ta sinta.

Task Force ta bay ta controla establecimentonan y si ta wordo constata cu nan no ta cumpli nan lo cera establecimento pa algun tempo, segun loke prome minister a anuncia.

Pa finalisa, prome minister a manifesta cu e sa cu tin hopi hende cu a cansa di e virus “pero e virus no a cansa di nos ainda” e virus t’ey cu tur forsa wardando pa hende pik’e y hib’e pa nan ser stima, fin di aña mester haci sacrificio pa asina proteha comunidad y famia, pero principalmente habri aña 2021 cu optimismo y cu oportunidad di recuperacion y di progreso.