Elmar ta invertiendo den instalacion di ‘charging stations’ pa vehiculonan electrico rond Aruba y alabes a inicia un transicion di flota di compania pa vehiculonan electrico, segun loke a wordo informa por medio di un comunicado.
Nan a señala cu ta invertiendo den vehiculo electrico pa bira un organisacion mas eficiente, unda vehiculonan electrico ta spaar entre 70-80% na costo di fuel y di mantencion. E ta provee un grado halto di conveniencia, y alabes e inversion aki ta cuadra cu e strategia financiero di e compania pa baha costo operacional.
Ademas ELMAR ta orguyoso pa anuncia su compromiso pa bira un organisacion “carbon neutral”, considerando cu transporte ta un di e causanan mas grandi rond mundo di “CO2 emission”. Nan ta compronde e importancia pa reduci “carbon footprint” y promove transporte sostenibel. Pa es motibo, Elmar, conhuntamente cu Utilities Aruba, a tuma e iniciativa pa inverti den e proyecto “Decarbonization Pathway” pa reduci e “CO2 emission”.
Den ultimo 3 aña, Aruba a conoce un crecemento di vehiculonan electrico cu ta un tendencia innovativo pa Aruba, como un compania vital di Aruba cu ta encarga cu distribucion di coriente, Elmar tin e responsabilidad pa instala chargers pa vehiculonan electrico rond di Aruba, unda te cu awor, Elmar a instala 9 charging stations y a inverti den 6 vehiculo electrico pa nos flota di compania.
E proyecto aki a cuminsa na 2021 cu instalacion di “Level 2 Chargers”, canando den e bon direccion pa asina cumpli (“compliance”) cu e ‘Paris Agreement’ cu a wordo aproba door di Parlamento di Aruba na 2016.
Durante 2022 nan a instala 5 EV ChargeUp stations na diferente localidad, manera Setar di Palm Beach, MFA Noord, Local Store Palm Beach, Elmar Oranjestad y Rotonde di Pos Chikito.
Desde 1 di december 2022, Elmar a lansa e proyecto piloto EV ChargeUp pa asina brinda participantenan e posibilidad pa cuminsa haci uso di e chargers aki di ELMAR rond di Aruba. EV ChargeUp stations ta situa na localidadnan conveniente y facilmente accesibel pa publico na unda e intencion ta pa tin disponibilidad di chargers na localidadnan strategico pa asina por haci uso di esakinan den un forma mas eficiente cu ta posibel.
Nan ta compronde cu e proyecto aki tin su desafionan, pero nan ta determina pa haci’e un exito. P’esey e prome 2 aña a instala chargers riba tereno di Elmar mes, pero pa 2023 lo cuminsa pone EV ChargeUp stations na negoshinan riba terenonan cu no ta di Elamr, pues lo mester traha riba un modelo di negoshi “business model” nobo pa asina por logra esaki.
Na Hulanda e uso di vehiculonan electrico a crece substancialmente y Gobierno di Hulanda ta trahando riba un plan pa 2030 unda tur auto nobo cu subi caminda publico no por tin “CO emission” mas, es decir cu tur auto mester ta sostenibel. Pa Aruba esaki ta keda dificil ainda, principalmente pa motibo cu mester tin alocacion di vehiculonan electrico nobo na nos agencianan di auto na Aruba. Pa stimula esaki, Elmar ta den proceso pa crea e infrastructura di EV ChargeUp Stations rond di Aruba.
Pa 2023, Elmar lo continua cu instalacion di mas chargers cu ta inclui “Level 3 Fast Chargers”, pa asina brinda un servicio hopi mas lihe unda cu lo por charge un vehiculo casi completamente den 30-45 minuut y alabes lo sigui inverti den vehiculonan electrico pa nan flota di compania den e proximo añanan pa asina contribui na e proceso di “decarbonization”.
Cu esaki, nan ta invita nos comunidad pa uni cu nan den e trayecto pa un futuro hopi mas eficiente y sostenibel, door di uza EV ChargeUp Stations y scogiendo vehiculonan electrico como medio di transporte.
