Dos punto cu e gremio di dunado di trabou, ATIA a yega di vocifera pa e cambio di aña nobo aki, tin di haber cu salario minimo. Pero otro topico cu e gremio di comerciante aki a yega di trece dilanti den varios ocasion, ta relaciona cu loke ta wordo yama ‘economia gris of shinishi.’

Encuanto salario minimo, tin sindicato manera STA cu a yega di expresa cu Gobierno mester considera un aumento di salario minimo, di acuerdo cu e indice di inflacion di un 5%. Presidente di ATIA, Ronald van Trigt, ta señala cu salario minimo ta na discrecion naturalmente di e Minister pa e subi esaki, pero mester tene na cuenta si pa mantene un ‘level playing field’. Esaki ta un punto fuerte cu ATIA semper ta preocupa p’e.

Van Trigt ta indica cu tin mucho hende den, locual cu ta yama, un economia gris. Un economia cu no ta contribui na nos pais. Por ehempel, 7 mil ilegal ta trahando riba Aruba y dificilmente por pensa cu ta bay saca nan tur tampoco. Ya cu e ta un mercado di rond di, probablemente 6 of 7 hotel, cu ta trahando cu ilegal. Pero sin duda e mercado ey ta haci e negoshi bira desproporcional. E dunado di trabou cu si ta cumpli, ta paga un parti desproporcional di e economia real. Ta algo cu ATIA a yega di trece dilanti den combersacion continuo cu Gobierno, y muy particularmente, cu Minister di Labor y esun di Economia.

ATIA a yega di trece dilanti e preocupacionnan di comercio, ya cu mester tin un ‘level playing field’. Muy specialmente ora cu ta wordo papia di cualkier gasto extra, ATIA ta haya cu tur hende mester contribui. P’esey tambe ta asina importante e reforma fiscal, pa por move y pone mas peso riba belasting indirecto, y menos peso riba belasting directo. Pero e ta un proceso cu ta demanda tempo pa realisa e cambionan necesario.

Sector comercial ta den un proceso di automatisacion, y e no ta uno facil. E ta un proceso cu a tuma hopi inversion di hende y placa. E tin su malesanan chikito cune. Mester tin un poco pasenshi, pasobra no ta facil pa introduci un sistema di cobra belasting nobo, full automatisa. Cualkier cambio asina aki, toch como comercio, mester carga tiki pasenshi.

Riba e proceso di cambio di impuesto directo pa indirecto, ta menciona cu kier pusha un aumento riba cabes di turista. Segun presidente di ATIA, den e reforma fiscal indirecto, tur esaki mester wordo inclui. Mester tin un reforma fiscal completo, ya cu bo no por keda cobra pa cada cos apart. E ta haya cu mester tin un impuesto cu ta cubri loke Aruba tin mester, pa nos por move bay padilanti.

Segun Van Trigt, bay cobra turista apart, etc., ta confundi e sistema mas cu e ta yuda. E ta haya cu Gobierno tin oido pa esaki tambe. ATIA Ta spera cu nan por implementa un sistema completo cu ta all inclusive.