Pa atende cu preocupacion di Ordo di Abogado y Hulanda: Lo bin celnan nobo y drechamento di otronan

Lo bin celnan nobo y tambe lo drecha otronan pa atende cu e preocupacion cu ta existi pa e mal condicion di e celnan den e diferente Warda di Polis.

Minister di Husticia, Andin Bikker a laga sa cu Ordo di Abogado a yega di vocifera nan preocupacion pa e situacion inhumano cu nan clientenan ta wordo deteni den e celnan di e Warda di Polis, unda e sospechoso di cualkier delito contra ley ta wordo deteni di forma preventivo.

Pues esaki -segun Minister- ta un preocupacion no di awor sino di basta aña caba. Un di e prome tema cu el a toca ora cu a asumi su funcion di Minister ta nan preocupacion continuo riba e mal condicion di e celnan aki. Igualmente nan ta bin hayando inspeccion anual di parti di e instancia concerni di Hulanda pa evalua e situacion di e detenidonan, no solamente den e celnan di e diferente Warda di Polis, pero den KIA mes.

E rapportnan ultimo no tabata alentador, nan ta situacionnan cu el a hereda, segun Minister Bikker. Pero 27 di juni ultimo su ministerio a manda un reportahe of actualisacion pa Hulanda, unda nan por a reporta ‘positivamente’ cu mayoria di recomendacion cu nan a manda, ta wordo atendi.

“E ta tarda un tiki, pero nos ta cumpliendo cu nan,” el a bisa. Esaki ta inclui e ambiente den cual e persona sospechoso ta wordo deteni. Tambe nan mester zorg pa e facilidad cu nan a wordo deteni ta suficientemente sigur pa garantisa cu nos sociedad ta suficientemente protegi di e personanan cu a comete un crimen.

Segun Minister Bikker, nan por a adresa caminda cu tabata por e celnan den e diferente Warda di Polis. Aworaki den su maneho nan ta bezig pa muda e Warda di Polis pa e facilidad na Wayaca. Nan kier centralisa e facilidad di diferente departamento di Polis, pero tambe nan lo bay traha 10 pa 15 cel nobo na Wayaca.

Tambe pa loke ta trata e mehoracion di e celnan, Minister Bikker ta bezig cu esaki teniendo na cuenta cu nan cuadro financiero dificil. Segun e mandatario nan ta cumpliendo cabalmente den e cuadro financiero aki cu retonan hopi grandi, pa nan por mehora e circunstancia bou e cual un persona ta deteni, ya sea den forma preventivo of ora cu e persona ta haya su sentencia caba.