Pa atende cu ola di desempleo pa 2021; Minister Glenbert Croes kier bin cu WW uitkering

Diahuebs ultimo, minister di Labor y Asunto Social, Glenbert Croes a tene un reunion riba terminacion di e ayudo di FASE, y tambe riba e tipo di ayudo social cu gobierno lo bay otorga pa mitiga e efecto cu Covid a causa den nos comunidad debi na e cantidad di persona sin trabao. Tambe e ta preparando un nota pa Conseho di Minister pa tuma un decision riba e tipo di ayudo pa persona desemplea den un forma mas structura.

Ta un hecho cu FASE ta termina dia 31 di december, y e ta haya cu gobierno mester ta prepara pa e desafionan di aña venidero. Pa e mandatario di Labor y Asunto Social, aña 2021 lo por bira uno hopi mas dificil compara cu 2020. Nan ta premira retiro masal pa e aña cu ta bini. E ta haya cu pais Aruba mester ta prepara pa e trahadonan cu ta perde entrada, kico lo bay pasa cu nan. Si no tin FASE, por lo menos mester tin algo na su luga cu por substitui loke e ayudo aki ta representa actualmente na 3.729 persona na luna di october ultimo.

Pa atende cu e situacion binidero – segun e mandatario – nan ta trahando riba un solucion structural, ya cu FASE tabata transitorio rumbo pa un solucion structural permanente. Nan ta trahando loke ta yama na Hulandes WW uitkering (Werkeloosheid wet uitkering) un ley cu ta brinda proteccion na e desempleadonan. Den e ley nan kier hancra cu esun cu ta keda sin trabao ta bay haya un compensacion pa atende cu nan compromisonan prioritario y logra sobrevivi. Tanten cu gobierno pa medio di Plataforma Nacional di Trabao cu tur departamento uni, ta traha riba e facilidad di empleo y alocacion di un trahado cu a perde trabao.

E ta haya cu den su reflexion di fin di aña como minister di Labor y Asunto Social ta bay ta pa tur hende cu a perde nan trabao a causa di e pandemia y crisis di Covid, y tambe su reto pa 2021, ta bay ta pone tur hende cu a perde entrada y trabao, back na trabao.

Pero mientras tanto, durante e periodo cu nan a perde trabao, nan mester keda sobrevivi. P’esey structura di asistencia social pa yuda e hendenan desemplea mester wordo haci structural y hinca den base di ley manera Hulanda tine via WW uitkering of asistencia social pa desempleado.