E sector hotelero a implementa e fase uno di nan protocol pa atende cu e tipo di fenomeno manera “Matthew”, asina sr. Daniel Aguirre kende a wordo apunta pa AHATA pa coordina e ehecucion di e protocol aki a declara.
Sr. Aguirre a bisa cu for di tres dia pasa e hotelnan ta bin preparando debidamente. El a splica cu e prome fase ta encera monitor mas di cerca e trayectoria di Matthew. Nan ta check nan inventario tanto di cuminda como di nan ekiponan di emergencia. Tambe nan personal y boluntarionan mester ta prepara pa atende cu cualkier eventualidad. Igualmente e hotelnan a cambia nan prioridad di mantencion pa den caso di emergencia. Actualmente tur cos ta sigui normal, pero nan prioridad ta cambia un tiki, ya cu nan mester ta debidamente prepara.
Den e temporada di horcan e sector hotelero ta haci su preparacion tur aña pa atende cu cualkier eventualidad. Tambe nan tin un manual di siguridad.
