Apesar cu e compania ASTEC cu ta encarga cu operacion di e waf di carga na Barcadera a anuncia pa medio di un comunicado cu e luna di januari aki tur trahado Terminal Workers y Terminal Operators a haya nan aumento  basa riba nan prestacion individual. Ademas nan a haya un ‘bashi premie’ riba nan salario di luna di januari. Pa sindicato STA cu ta representa mayoria di e trahadonan, nan  no ta contento cu e situacion actual cu e trahadonan ta pasando aden.

Lider di STA, Diego de Cuba a declara na Bon Dia Aruba cu e problema actual tin di haber cu e contracto colectivo (CAO) cu a vence y cu nan a laga core pa un aña mas. Pero e sindicato aki ta bisa cu lamentablemente ‘locual nan a duna e trahadonan como aumento general ta cos di yora’.Bon Dia Aruba ta trece tur dos banda dilanti.

ASTEC y STA
Gerencia di ASTEC a informa cu nan a dicidi di duna aumento y bashi premie na nan empleadonan,  aunke cu no a yega na un acuerdo di contracto colectivo (CAO) nobo. Esaki despues di e negociacion cu nan ta hibando cu sindicato STA y cu intermediacion di Mediado di Gobierno. Den su comunicado ASTEC ta confirma cu a yega na un acuerdo riba e parti financiero, pero e negociacion a pega riba e texto di e CAO mes, entre otro riba a parti di e obligacion di traha overtime. Nan ta haya cu overtime ta esencial pa e compania ya cu nan tin e obligacion di brinda servicio na nos comunidad na cualkier momento.

Pero di parti di sindicato STA cu pa prome biaha ta negosha un CAO pa e trahadonan di ASTEC -despues cu nan a gana e referendum contra sindicato Union Portuario Arubiano (UPA)- nan ta haya cu awor ta e momento pa nan por unifica nan mes conhuntamente cu e trahadonan di APA N.V.  STA tambe ta representa sindicalmente e trahadonan di APA, y segun sindicalista de Cuba su vision ‘nan tur ta keda trahadonan di waf’. STA kier crea un base solido pa nan exigi di parti di gobierno cu nan por mira e contract cu a wordo firma entre APA y ASTEC  ya cu nan ta mira cu e gran perdedo den e negociacion aki tabata e trahadonan.

Ta asina cu ASTEC N.V. ta existi for di september 1983 y ta conta cu no menos di 80 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera.

Pa STA ta importante pa drecha henter asunto relaciona cu e trahadonan di ASTEC y tambe di APA  mediante e gobierno nobo. E lider sindical di STA a declara cu si berdaderamente e gobierno aki ta predica cu e persona of individuo ta central, STA ta kere cu gobierno ta bay duna oido na nan peticion pa mira e contracto cu a wordo cera entre ambos empresa.  Nan ta haya e punto aki di suma importancia, mirando e echo cu ora bo ta negosha un CAO ‘bo mester sa con bo ta para y nos no sa kico tin den e contracto cu a ser firma entre APA y ASTEC’.

Segun presidente di STA, nan sa cu den pasado tabatin un destaho pa e mudamento di waf y ASTEC no a gana e bid aki. Segun sindicalista de Cuba e bidding aki a wordo modifica na peticion di gobierno di Aruba pa duna ASTEC e waf di Barcadera. “Pasobra ASTEC no a gana e bidding!” Riba e punto aki nan a puntra ASTEC si tin monopolio of no, pasobra si no tin monopolio e ta haya cu mas laat por bin otro waf di container den otro sitio di nos isla.

Otro punto cu STA ta considera importante tin di haber cu e salud di e trahadonan, pero tambe cu e ekiponan cu nan ta traha cu ne. El a bisa cu e sulfur cu ta bin for di WEB ta dañino te hasta mortal pa e trahadonan su salud y tambe pa e makinaria di ASTEC. Ya cu e sulfur ta comiendo e makinaria di ASTEC, y e ta haya dificil di muda WEB for di unda nan ta situa actualmente. Nan tin un lista di puntonan cu nan kier papia cu ASTEC pero cu gobierno tambe pa wak unda nan por yega na otro.

Posibel accion
Den e situacion actual pa ASTEC ta di suma importancia cu ora tin barco di container cu e trahadonan mester ta disponibel pa traha pa asina  ASTEC por cumpli cu e obligacion di brinda servicio ora tin mester. Nan ta splica cu e operacion actual como Multi-Cargo Sea Terminal Operator na Barcadera ta encera un responsabilidad grandi, y ASTEC ta buscando continuamente pa atende cu e variacion enorme di peticion pa cu servicio na un manera sigur y sostenibel, segun gerencia di ASTEC. Mientras cu STA su posicion ta cu e sindicato aki ta considera di suma importancia pa wak e contenido di e contracto cu a keda firma entre APA y ASTEC. E sindicalista no ta descarta cu si nan peticion no ta wordo honra debidamente, nan ta premira accion.

Sinembargo nan ta purba tur manera pa evita un accion. STA ta spera cu nan lo por sinta cu gobierno na mesa y ya caba e carta ta bayendo caba pa solicita e reunion aki cu caracter di urgencia. “Si nos ta wordo neglisha den esaki, e ora si bo por spera un accion,” segun sindicalista De Cuba.