Minister di Asuntonan di Reino, Ronald Plasterk a indica cu si Aruba kier fia placa via Hulanda pa asina haya un interes mas abou, nos financia publico mester keda bou supervision. Otro aña e supervision di CAft lo termina y ta necesario pa cuminsa discuti riba ki forma di supervision Aruba kier keda cu ne.

E minister Hulandes a papia riba e tema aki ayera mainta cu minister di Financia di Aruba, Angel Bermudez. E ultimo ta bisa cu pa e mes no tin discusion cu Aruba mester keda cu un forma di supervision riba su financia publico. “Esey ta forma parti di con bo ta regla bo financia publico.

Manera cu tambe ta e caso den mas cu 100 pais. Mi no ta kere cu Aruba mester bira un excepcion, pasobra e parti aki tambe ta importante pa mantene bo reputacion.” Sinembargo e no ta haya cu e supervision ta den man di Hulanda. Al contrario Aruba mes mester regla esaki e biaha aki, sr. Bermudez ta enfatisa. “Importante ta cu e instituto di supervision por controla den un forma obhetivo y cu conocemento nos presupuestonan. Nos mester fiha prome nos normanan. No asina stricto cu e ultimo añanan (bou Caft) pero nos mester mara nan si. Y ora bo tin normanan, bo mester un instancia tambe pa controla si bo ta tene bo mes na nan.” E instituto por consisti di miembronan local, regional of di Reino, of hasta internacional cu expertonan di IMF, asina e minister Arubano ta indica. “Pero ta keda cu mi ta haya cu Aruba mes ta esun cu lo regla esaki. E ta un asunto interno.” Nos partner den noticia Ret Karibense a puntra nos minister di Financia tambe si Aruba ta considerando CAft (cu te keda te otro aña), pues pa continua cu e instituto aki? “Mi no sa pasobra esey ta un pregunta pa e politiconan.”

Ora a confronta e minister cu e mes tambe ta un politico, e ta bisa cu e no a discuti cu minister Plasterk riba e opcion aki. Y tambe e keda para riba e punto cu esey ta un ‘cuestion politica’. “CAft a drenta nos sistema via e porta patras. Esey no ta e manera cu bo ta anda cu otro (Hulanda, red.). P’esey ta anos cu lo mester regla e supervision, pa asina no por haya nos cu sorpresanan atrobe.” Segun minister Plasterk e ora mester tin un forma di supervision pa asina Aruba por probecha di fia barata placa por medio di Hulanda. Pero segun minister Bermudez e asunto aki ta para riba su mes. “Ainda nos tin e acuerdo di Diahuebs Santo cu ambos partido no a ehecuta ainda. Tambe tin riba mesa ainda e Laft (ley cu ta regla e CAFT). Tur tin un fecha cu lo vence pronto y mi ta haya cu prome nos yega e fecha, nos mester, e aña aki caba, discuti riba e forma di supervision riba nos financia publico y ken lo bay hacie.”

Minister Hulandes Plasterk ta indica cu e combersacion riba esaki entre e dos pais ta uno ‘habri’. Sinembargo e ta keda riba e punto cu mester tin un forma di condicion pa ora Aruba kier cuminsa fia via Hulanda. “Paisnan cu ta bin na remarke, ta para bou di supervision di CFT. Nan ta Corsou y St. Maarten. Y asina nan ta gana hopi riba e parti di interes. E ta un diferencia entre fia contra 2% (cu ayudo di Hulanda, red.) y 6 pa 7% (sin ayudo, red.) riba e mercado di capital. Pero esaki mester wordo regla den un forma pasobra Hulanda ta tuma e riesgonan financiero. Mester bin cierto garantia. Pasobra e mercado mes no ta loco.”