Docente di gymnastiek, esta Andy Gomes, ta un docente na Unidad di EPI pa hopi aña. Na EPI tin dos maestro di gymnastiek y pa añanan ambos maestro ta duna les den solo y no tin e materialnan necesario. Pa e motibo aki dialuna mainta na EPI meneer Gomes a mustra su malcontento.
Dialuna mainta alumnonan y coleganan di meneer Gomes a sostene e docente cu un walk out. Nan a dicidi di sostene meneer Gomes pa e echo cu tin cosnan no ta bayendo bon. Na EPI tin dos docente, di cual un bus so tin pa nan uza ora di hiba alumnonan bay haci gym. “Kiermen un di nos semper ta na pia. Un otro cos no tin gymzaal,” meneer Gomes a bisa.
E solo ta hunga un rol, e muchanan ta keha hopi. Incluso tin biaha nan tin cu cana desde scol y bay sea na Stadion of veld di RCA. Tin yen cos cu a pasa den ultimo tempo, segun meneer Gomes. El a indica cu ora kier haci uzo di e bus, esaki no por pa motibo cu e bus a wordo fia na un otro sector. Despues di basta aña trahando na e scol, el a dicidi di tuma un pauze un rato pasobra e no lo duna les te ora cu cosnan wordo drecha. Sea nan ta haya un bus nobo of bin cu un gymzaal of por ta baha e orarionan di duna les.
Henter dia den solo
Meneer Gomes ta pasa henter dia den solo, e ta cuminsa mainta y ta caba di 2.15 di merdia. Tin biaha e ta yega scol bek casi 4’or di atardi. Esaki ta depende di e module (les) e tin ta dunando. Tur loke ta pasando a pone cu meneer Gomes a tuma e decision di pone tur docente na altura. Diadomingo el a manda un e-mail na su coleganan y a splica nan kico tur e ta pasa aden. “Cosnan chikito, pero di tur e añanan,” el a indica. Meneer Gomes kier a vocifera con e ta sinti cu e situacion aki.
Ora cu el a yega scol ayera mainta, den e di dos ora di les tur docente a stop di duna les y sostene meneer Gomes. Tur docente y studiante a yega hunto pa asina para tras di meneer Gomes mustrando cu nan no ta di acuerdo cu e situacion.
Spera solucion lihe
El a papia cu e managernan y kendenan na nan turno a bay papia cu e otro managernan te yega na e directiva di EPI. Meneer Gomes ta spera cu e protesta cu e ta haciendo lo no ta uno largo. Pa añanan e ta duna les y si ta pe e lo cu pa bin cu un gymzaal. Pero pa traha un gymzaal ta costa miyones. Kiermen esey no lo bin.
“Mi lo prefera aworaki manera tin un afdak cu e studiantenan por tin un sombra. Esaki ta pa nan stop di keha aunke cu nan tin esaki pa 1.30 so. Pero ami tin e 32 ora pa siman, 16 aña sigui caba cu e salud no ta mucho bon tampoco,” el a bisa. Meneer Gomes no kier haya cancer di cuero. E ta puntra si nan por pone un afdak mes riba e campus djis pa por haci deporte, esaki lo ta un ayudo.
Gymzaal
Antes tabata tin dos gymzaal, pero awo nan no t’ey mas. Un gymzaal a bira un auditorio, mientras cu e otro a bira un foodcourt. Pero 12 pa 13 aña atras, e idea tabata pa bin cu un gymzaal nobo. E ta sigui indica, cu pa un motibo e placa a caba y esaki no a bin mas.
Esaki ta prome biaha cu meneer Gomes a hinca tur e situacion den un carta, pa asina mustra tur hende con esaki ta. Logicamente tur hende sa di e problema, pero nunca el a bin dilanti asina aki. E gana di duna les a kita. Si no bin un solucion, meneer Gomes no tin hopi gana di duna les. E ta prefera pa e directiva bin cu un accion, pa nan haya e solucion di e problemanan cu ta tumando luga. E kier mira un afdak, e kier mira algo den e direccion cu e por haci deporte na scol mes. Na e momentonan aki e ta perde mei ora pa bay y bin bek scol. Kiermen 15 minuut pa bay Stadion y 15 minuut pa bin bek. No mester lubida cu mester warda e alumnonan cambia nan paña. “Mi kier algo na e campus mes pa asina pone nan move,” el bisa. Ayera merdia gerencia mester a sinta hunto pa asina despues meneer Gomes tende di nan kico ta e solucionnan.
(potret: NoticiaCla)
